ԵՐԵՎԱՆ, 19 մայիսի – Sputnik․ Գեղարքունիքի և Սյունիքի մարզերում պարեկներին փորձել են կաշառել։ Տեղեկությունը հայտնում է ՀՀ հակակոռուպցիոն կոմիտեի մամուլի ծառայությունը։
Երկու դեպքերն էլ տեղի են ունեցել այս տարվա ապրիլին։ Մի դեպքում Գեղարքունիքի մարզի գումարտակի պարեկները ստուգման արդյունքում հայտնաբերել են, որ քաղաքացին չի ունեցել տվյալ տրանսպորտային միջոցը վարելու համար անհրաժեշտ վարորդական իրավունքի վկայականի կարգ, ուստի կազմվել է վարչական իրավախախտման վերաբերյալ արձանագրություն: Դրանից հետո ավտոմեքենայի ուղևորը պարեկի գրպանն է դրել 30․000 ՀՀ դրամ, ինչի համար էլ ձերբակալվել է։
Մեկ այլ քրեական վարույթով էլ Սյունիքի մարզի գումարտակի պարեկները հանդիպակաց ուղղությամբ երթևեկելու համար կանգնեցրել են ոչ սթափ վիճակում ավտոմեքենան վարող քաղաքացուն։ Նա սթափության ստուգում չանցնելու համար պարեկներին կաշառք է առաջարկել, որից հետո ձերբակալվել է:
Պարեկներին կաշառք առաջարկելու համար երկու անձանց մեղադրանք է ներկայացվել ՀՀ քրեական օրենսգրքի 436-րդ հոդվածի 1-ին մասով և 436-րդ հոդվածի (Կաշառք տալը) 2-րդ մասի 3-րդ կետով:
Քրեական վարույթներով նախաքննությունն ավարտվել է: Վարույթների նյութերը մեղադրական եզրակացություններով ուղարկվել են ՀՀ հակակոռուպցիոն դատարան:
ՀՀ հակակոռուպցիոն կոմիտեից հիշեցնում են, որ կաշառքը քրեորեն հետապնդելի է, նախատեսված է ընդհուպ մինչև 7 տարի ժամկետով ազատազրկում։