ԵՐԵՎԱՆ, 18 մայիսի - Sputnik. Այսօր Գազայի հատվածում իսրայելական հարվածների հետևանքով 5 լրագրող է զոհվել, հայտնում է ՌԻԱ Նովոստին՝ վկայակոչելով պաղեստինյան ՀԱՄԱՍ շարժումը:
«Իսրայելի բանակը միաժամանակ և դիտավորությամբ հարվածել է հինգ լրագրողների՝ Ազիզ ալ Հաջարին, Նուր Կանդիլին, Աբդ ար Ռահման ալԱբադիլեին, Խալեդ Աբու Յուսուֆին և Ահմեդ ազ Զեյնատիին»,- ասվում է ՀԱՄԱՍ-ի հայտարարության մեջ։
Հայտարարության համաձայն՝ Իսրայելի բանակը կիրակի առավոտյան գնդակոծել է այն տներն ու վրանները, որոնցում լրագրողներ են եղել, ինչի հետևանքով նրանց հետ միասին զոհվել են նրանց երեխաներն ու ընտանիքի անդամները:
Ավելի վաղ հաղորդվել էր, որ Գազայում հայտնաբերել են ՀԱՄԱՍ-ի առաջնորդներից մեկի մարմինը:
Գազայում իսրայելական գնդակոծության հետևանքով 5 լրագրող է զոհվել
Նախօրեին Իսրայելի պաշտպանության բանակը նոր խոշոր հարձակում է սկսել Գազայի հատվածում։
ՀԱՄԱՍ-ի տվյալներով՝ 2023-ի հոկտեմբերի 7-ից Գազայում զոհվել է 220 լրագրող։
Առողջապահության նախարարության վիճակագրության համաձայն ՝ մարտի 18-ից ի վեր, երբ Իսրայելը վերսկսել է գնդակոծությունները, Գազայում զոհվել է ավելի քան 3 հազար մարդ, վիրավորվել է գրեթե 9 հազարը:
Մարտի 18-ի գիշերը Իսրայելի պաշտպանության բանակը վերսկսել է հարվածները Գազայի հատվածի ուղղությամբ: Իսրայելի վարչապետ Բենյամին Նեթանյահուն հայտարարել է, որ հարձակումները շարունակվել են՝ կապված պաղեստինյան ՀԱՄԱՍ շարժման կողմից հրադադարի ռեժիմի երկարաձգման և պատանդների ազատման ամերիկյան ծրագիրն ընդունելուց հրաժարվելու հետ:
Իսրայելի և պաղեստինյան ՀԱՄԱՍ շարժման միջև հրադադարը պաշտոնապես ավարտվել է մարտի 1-ին, սակայն Գազայի հատվածում կարգավորման շուրջ բանակցությունների կողմերին ներգրավելու միջնորդների փորձերի շնորհիվ ռազմական գործողությունները չեն վերսկսվել: Այնուամենայնիվ, Իսրայելը դադարեցրել է էլեկտրաէներգիայի մատակարարումը Գազայի հատվածում գտնվող աղազերծման կայան՝ փակելով նաև տարածք մարդասիրական օգնություն տեղափոխող բեռնատարների մուտքը: