ԵՐԵՎԱՆ, 8 մայիսի - Sputnik. ՔՊ–ն հաջորդ ընտրություններին դաշինքով չի գնա ու կստանա ընտրողների 50+1 ձայն։ Այս մասին այսօր լրագրողների հետ զրույցում ասաց ՀՀ ԱԺ նախագահ Ալեն Սիմոնյանը։
«Նախ Ռոբերտ Քոչարյանը ու Սերժ Սարգսյանը մեզ այդ հարցում կօգնեն, ինչպես նաև Արթուր Վանեցյանները ու նման մարդիկ։ Հենց իրենք մտնեն եթեր, մեր վարկանիշը բարձրանալու է։ Իսկ եթե նրանց միանան Վազգեն Մանուկյանները և Սրբազանները` վարկանիշը եւս 5 սանդղակով կբարձրանա, իսկ եթե իրենք բոլորով նման բաներ անեն, մենք կարող ենք տնից դուրս չգանք»,– ասաց Ալեն Սիմոնյանը։
ԱԺ նախագահը վստահ է, որ իմաստուն հայ մարդը չի ցանկանում նախկինների վերադարձը և հասկանում է, որ եթե անգամ այսօրվա իշխանությունը սխալվում է, բայց իշխանության տերը ինքն է։
«Այսօրվա պես հասանելի իշխանություն ՀՀ–ն երբեք չի ունեցել ու չի ունենա։ Էն փոփոխությունները, որ մենք արել ենք... էսօր բիզնեսմեն կա՞, որ իմ համարը ունի ու կարա զանգի ինչ-որ հարց լուծի, ուզում եք ասեք մարդիկ էտ ամեն ինչը չեն տեսնո՞ւմ ու չեն գնահատո՞ւմ»,– հավելեց նա։
ԱԺ նախագահը համոզված է, որ այս պահին ՔՊ–ն կարող է միանձնյա ձևավորել իշխանություն և շարունակի բարեփոխումները երկրում:
Հավելենք, որ ԱԺ հերթական ընտրությունները նախատեսված են 2026-ի ամռանը։