ԵՐԵՎԱՆ, 7 մայիսի – Sputnik․ Նոր Սահմանադրության տեքստը պատրաստ կլինի առաջիկա 10 ամիսների ընթացքում։ Լրագրողների հետ ճեպազրույցում ասաց արդարադատության նախարար Սրբուհի Գալյանը։
«Մասնագիտացված հանձնաժողովը մշակել է հայեցակարգ․ հիմա աշխատանքների իրականացման առաջնորդությունը ստանձնել է արդարադատության նախարարությունը, և Սահմանադրության տեքստի մշակումն իրականացնում ենք մեր ներքին ռեսուրսի հաշվին»,- նշեց Գալյանը՝ անդրադառնալով լրագրողների այն հարցին, թե ինչի համար է հանձնաժողովին շուրջ 60 միլիոն դրամի աշխատավարձ հատկացվել։
Ըստ նրա՝ հանձնաժողովի աշխատանքում ստեղծված հայեցակարգի դրույթները որոշակիորեն տեղ կգտնեն Սահմանադրության նոր տեքստում։
Նախարարը դժվարանում է ժամկետ նշել, թե երբ հանրաքվեի կդրվի Սահմանադրությունը։
Շեշտում է՝ երբ տեքստը պատրաստ լինի, հայեցակարգային առանձին դրույթներ հանրության դատին կներկայացվեն, մանրամասն քննարկումներ կարվեն։ Վստահեցնում է՝ կուլիսային ոչինչ չի արվում, քանի որ ի վերջո հանրաքվեով հենց ժողովուրդն է ընտրությունը կատարելու։ Նախարարի խոսքով՝ բավարար ժամանակ կտրվի հանրությանն ու քաղհասարակությանը՝ նոր տեքստին ծանոթանալու և որոշում կայացնելու համար։