ԵՐԵՎԱՆ, 2 մայիսի – Sputnik. Թուրքիայի նախագահի աշխատակազմը հերքել է տեղեկությունները, թե Իտալիան Ռեջեփ Թայիփ Էրդողանի խնդրանքից հետո չեղարկել է Թուրքիայի 5000 քաղաքացիների` վիզա ստանալու հարցազրույցները:
Նշվում է, որ Էրդողանը ապրիլի 29-ին մեկօրյա այցով գտնվել է Իտալիայում: Վերջին ամիսներին թուրքական ԶԼՄ-ները պարբերաբար բարձրացնում են վիզաների տրամադրման մերժման թեման, հատկապես ԱՄՆ-ի և Գերմանիայի դեսպանատների կողմից:
«Առանձին լրատվամիջոցների և սոցցանցերի տարածած պնդումը, թե Էրդողանը խնդրել է վիզային ռեժիմի դյուրացման մասին, և Իտալիան չեղարկել է 5 հազար վիզային գրանցումները, մանիպուլյատիվ է», - ասված է Թուրքիայի նախագահի աշխատակազմի հաղորդակցության վարչության ապատեղեկատվության դեմ պայքարի կենտրոնի հայտարարության մեջ:
Ըստ պարզաբանման` Ստամբուլում Իտալիայի գլխավոր հյուպատոսությունը հայտնել է մուտքի արտոնագրերի գրանցման համակարգում տեխնիկական խափանման մասին: Հնարավոր խնդիրների առաջացումը կանխելու նպատակով հայտերի մի մասը չեղարկվել է։
«Վիզային գրանցումների չեղարկումը որևէ կերպ կապված չէ Իտալիա կատարած այցի ժամանակ նախագահ Էրդողանի արած հայտարարությունների հետ։ Կոչ ենք անում չվստահել կեղծ տեղեկություններին», - ասվում է հայտարարության մեջ։
Ավելի վաղ՝ 2024 թվականի օգոստոսին, Թուրքիայի արտգործնախարար Հաքան Ֆիդանը հայտնել էր, որ Անկարան ավարտել է Եվրամիության հետ վիզաների ազատականացման համար անհրաժեշտ 72 չափորոշիչներից 66-ի կատարումը։ Նա նշել էր, որ բանակցությունները շարունակվում են, և իշխանությունները ձգտում են վերացնել մնացած խոչընդոտները, որոնք խանգարում են Թուրքիայի քաղաքացիներին շենգենյան վիզա ստանալ: