ԵՐԵՎԱՆ, 26 ապրիլի – Sputnik. Կինը շենքի 2-րդ հարկում գտնվող իրենց տան պատշգամբի փլուզման հետևանքով լվացք կախելու պահին ընկել է ցած։ Տեղեկությունը հայտնում է shamshyan.com-ը։
Դեպքը տեղի է ունեցել ապրիլի 26-ին, Երևանի Շենգավիթ վարչական շրջանի Արարատյան փողոցում։
«42–ամյա Կարինե Ս–ն Արարատյան 66 շենքի 2-րդ հարկի իրենց բնակարանի պատշգամբում լվացք կախելիս է եղել, երբ այն փլուզվել է։ Նրան առաջին օգնություն են ցուցաբերել քաղաքացիները, ապա շտապօգնության աշխատակիցներ տեղափոխել են «Էրեբունի» ԲԿ»,– հայտնում է կայքը։
Կայքի տեղեկություններով` այդ շենքում մի քանի պատշգամբ էլ կա, որոնք վտանգ են ներկայացնում մարդկանց կյանքի համար, քանի որ ամեն պահի դրանք էլ կարող են փլուզվել։