Միջազգային պայմանագիրը չի կարող վերազգային իրավական ակտ լինել. Sputnik Արմենիայի հետ զրույցում ասել է արդարադատության նախկին փոխնախարար, փաստաբան Արամ Օրբելյանը` հակադարձելով Նիկոլ Փաշինյանի հայտարարությանը, թե խաղաղության համաձայնագիրը ստորագրումից հետո կստանա ավելի բարձր իրավական ուժ, քան ՀՀ ներքին օրենսդրությունը։
«Միջազգային պայմանագիրը վերազգային չէ, և չմոռանանք, որ միջազգային պայմանագրերը ՀՀ–ում վավերացվում են հատուկ օրենք ընդունելու միջոցով։ Այսինքն` դրանք, ըստ էության, օրենքի տեսակ են դառնում ՀՀ իրավական համակարգում»,– ասել է Օրբելյանը։
Մարտի 13-ին Ադրբեջանը հայտարարեց, որ Հայաստանը համաձայնել է խաղաղության պայմանագրի չհամաձայնեցված երկու կետերի վերաբերյալ իրենց առաջարկի հետ, և այդպիսով պայմանագրի բոլոր կետերը համաձայնեցված են։ Ժամեր անց, Հայաստանի արտգործնախարարությունը ևս հաստատեց ադրբեջանական կողմի հայտարարությունը։