ԵՐԵՎԱՆ, 27 մարտի – Sputnik. ՀՀ գլխավոր դատախազ Աննա Վարդապետյանն Ազգային ժողովին ներկայացրեց «Պատիվ ունեմ» խմբակցության պատգամավոր Տարոն Մարգարյանի նկատմամբ քրեական հետապնդում հարուցելուն համաձայնություն տալու մասին միջնորդագիրը:
Երևանի նախկին քաղաքապետ Տարոն Մարգարյանը մեղադրվում է երկու դպրոցի և մեկ մանկապարտեզի տարածքները ապօրինաբար օտարելու և փողերի լվացման մեջ։
«Ինչի ենք մենք դատական ակտի առկայության պայմաններում գալիս ու փողերի լվացման մեղադրանք առաջադրում, որովհետեւ մեզ նախորդող հանցագործության վերաբերյալ վճռաբեկ դատարանի վերջին նախադեպերի իմաստով բավար է միայն արարքի ընդհանրական նկարագրությունը, բայց քանի որ գործն ուղարկված էր դատարան, մենք սպասեցինք մինչև դատական ակտով որոշում կլինի, և դա կդիտարկենք որպես նախորդող հանցագործություն, որն անհրաժեշտ է փողերի լվացման համար»,– ԱԺ–ում հայտարարեց գլխավոր դատախազը։
Վարդապետյանը շեշտեց, որ դատախազությունը չի միջնորդում պատգամավորին ազատությունից զրկելու համաձայնություն տալ, այլ՝ քրեական հետապնդում հարուցելուն կողմ քվեարկել։
Նշենք, որ ընդդիմադիր «Պատիվ ունեմ» ու «Հայաստան» խմբակցությունները բոյկոտում են ու չեն մասնակցում նիստին։