ԵՐԵՎԱՆ, 27 մարտի – Sputnik․ «Մայր Հայաստան» դաշինքի 12 համակիր է բերման ենթարկվել: Այս մասին 24News-ի հետ զրույցում ասել է դաշինքի Գյումրու քաղաքապետի թեկնածու Կարեն Սիմոնյանը:
Սիմոնյանը նաև հայտնել է, որ Էմմա Գրիգորյանն ազատ է արձակվել։
«Երկու երեխաների առջև սթրեսի ենթարկելով ձերբակալեցին, բայց ոչինչ չկարողացան գտնել»,- նշել է Սիմոնյանը:
Ինչպես հայտնել ենք, այսօր առավոտյան իրավապահ մարմինները խուզարկություններ են կատարել «Մայր Հայաստան» ընդդիմադիր դաշինքի Գյումրու գրասենյակում։ Դաշինքի ներկայացուցիչ Էմմա Գրիգորյանին Գյումրիից տեղափոխել էին Երևան` Հակակոռուպցիոն կոմիտե։
Ավելի վաղ Հակակոռուպցիոն կոմիտեն հայտնել էր, որ առաջիկա ընտրությունների հետ կապված ընտրակաշառքի մի քանի դեպքերով վարույթ է հարուցվել` հրապարակելով զրույցի ձայնագրությունը։
Հիշեցնենք, որ Գյումրում ՏԻՄ ընտրություններ կանցկացվեն մարտի 30-ին: Մասնակցելու հայտ է ներկայացրել 6 կուսակցություն և 3 դաշինք։ Գյումրիում կգործի 82 ընտրատեղամաս: Ավագանու արտահերթ ընտրությանը մասնակցելու իրավունք ունի 112 հազար 160 բնակիչ։