ԵՐԵՎԱՆ, 27 մարտի – Sputnik. Հայաստանում Դեբեդ գետի վրայով երկրորդ ժամանակավոր կամուրջն է կառուցվել։ Այս մասին ՀՀ կառավարության նիստում հայտարարել է տարածքային կառավարման և ենթակառուցվածքների նախարար Դավիթ Խուդաթյանը։
Գետի վրայով անցնող հիմնական կամուրջը (Ախթալան և հարակից մի քանի գյուղերը Հայաստանի մնացած մասի հետ կապող) փլուզվել էր անցյալ տարվա մայիսին երկրի հյուսիսում տեղի ունեցած ջրհեղեղների ժամանակ։ Դրանից հետո գետի վրա ժամանակավոր պողպատե կամուրջ կառուցեցին, այժմ դրան ավելացվել է ևս մեկը։
Ինչպես նշեց Խուդաթյանը, էսքիզներ են կազմվում ինչպես այնտեղ, այնպես էլ Խաշթառակ գյուղի մոտ (Աղստև գետի վրայով) մշտական կամուրջների կառուցման համար։ Հետագայում շինարարության մրցույթ կհայտարարվի։
Բացի այդ, 2025 թվականին նախատեսվում է ավարտել Երևան-Իջևան ավտոճանապարհի (Դիլիջանի և Գոշ գյուղի ոլորանների միջև) վնասված հատվածի վերանորոգումը։ Այդպիսով ջրհեղեղից հետո ենթակառուցվածքների վերականգնման աշխատանքները ամբողջությամբ կավարտվեն:
Հիշեցնենք, որ 2024 թվականի մայիսի 26-ին հորդառատ անձրևների պատճառով ափերից դուրս էին եկել Դեբեդ (Ալավերդու, Ախթալայի շրջաններում և Վրաստանի հետ սահմանին) և Աղստև (Իջևանի մոտ) գետերը։ Ջրհեղեղը մի քանի մարդու կյանք էր խլել, հարյուրավոր քաղաքացիներ տարհանվել էին:
Բացի այդ, ճանապարհների և ենթակառուցվածքների զգալի ավերածություններ էին գրանցվել Լոռու և Տավուշի մարզերում։