ԵՐԵՎԱՆ, 23 մարտի - Sputnik. Իսրայելի կառավարությունը հավանություն է տվել Գազայի հատվածից կամավոր արտագաղթի հարցերով մարմնի ստեղծմանը։ Այս մասին հայտնել է Իսրայելի վարչապետի գրասենյակի խորհրդական Դմիտրի Գենդելմանը։
«Այսօր նախարարների կաբինետը հավանություն է տվել վարչության ստեղծմանը, որը կզբաղվի Գազայից կամավոր արտագաղթով»,- գրել է Գենդելմանը Telegram-ի իր ալիքում:
Ավելի վաղ ԱՄՆ նախագահ Դոնալդ Թրամփը Իսրայելի վարչապետ Բենիամին Նեթանյահուի հետ հանդիպման ժամանակ կարծիք էր հայտնել, որ Գազայի հատվածի բնակիչները կարող են վերաբնակեցվել տարբեր երկրներում, այդ թվում՝ Հորդանանում և Եգիպտոսում՝ հավելելով, որ ԱՄՆ-ն վերահսկելու է Գազայի հատվածը։
Հունվարի 19-ից մարտի 1-ը Գազայի հատվածում ուժի մեջ է մտել հրադադարը՝ Իսրայելի և պաղեստինյան ՀԱՄԱՍ շարժման միջև պաղեստինցի գերիների դիմաց իսրայելցի պատանդներին ազատ արձակելու համաձայնագրի առաջին փուլի շրջանակում։ Մարտի 2-ի գիշերը Գազայի հատվածում համաձայնեցված զինադադարի ավարտից հետո, որը տևել է 42 օր, Իսրայելի իշխանությունները հայտարարել են, որ ԱՄՆ նախագահի բանագնաց Սթիվեն Ուիտկոֆն առաջարկել է Գազայի հատվածում ժամանակավոր զինադադարը երկարաձգելու նոր ծրագիր։
Մարտի 2-ին Իսրայելը հայտարարել է Գազայի հատված մարդասիրական օգնության մուտքն արգելելու մասին և սպառնացել հետագա ճնշում գործադրել ՀԱՄԱՍ-ի վրա, եթե այն հրաժարվել ընդունել անկլավում հրադադարը երկարաձգելու և մնացած պատանդներին ազատելու ամերիկյան նոր ծրագիրը: