ԵՐԵՎԱՆ, 21 մարտի – Sputnik. ՀՀ–ում 2024 թվականի մայիսի 1–ից մինչ օրս 493 490 վարորդ օգտվում է տուգանքը վճարելու բոնուսային բաղադրիչից։ Այդ մասին ՀՀ ԱԺ պաշտպանության և անվտանգության հարցերի մշտական հանձնաժողովի նիստի ժամանակ ասաց ՀՀ ներքին գործերի նախարար Արփինե Սարգսյանը։
Նա նշեց, որ 2024 թ. մայիսի 1–ից ուժի մեջ մտած բոնուսային բաղադրիչի ներդրման արդյունքում շուրջ 90 հազար վարորդ էլ իսկ օգտվում է 20 տոկոս բոնուսային բաղադրիչից, եթե ճանապարհատրանսպորտային խախտումների մասին ծանուցումները ստանում է էլեկտրոնային եղանակով։
Նախարարն ավելացրեց, որ 403 490 քաղաքացի էլ օգտվել է 30 տոկոս նվազ վճարելու հնարավորությունից, եթե տուգանքը վճարել է 15 օրվա ընթացքում։
«Սրանք վատ թվեր չեն, ու մենք պետք է շարունակենք այս գործիքակազմի խթանումը և հետևողական աշխատանքներն այս ուղղությամբ, որպեսզի թվային լուծումներից օգտվելը մեր քաղաքացիների համար դառնա նախընտրելի»,– ընդգծեց նախարարը։
Հիշեցնենք, որ համաձայն ներդրված համակարգի` այն վարորդները, որոնց խախտումներն արձանագրվում են տեսալուսանկարահանող սարքերի միջոցով, և վարորդը համաձայնում է ծանուցումները ստանալ էլեկտրոնային եղանակով, ապա տուգանքի չափն ավտոմատ կերպով նվազեցվում է 20 %–ով։ Մյուս դեպքում, եթե վարորդը ճանապարհային երթևեկության կանոնները խախտելու դեպքում նշանակվող տուգանքները վճարում է 15-օրյա ժամկետում, ապա գումարը նվազում է 30%–ով։
Տրամադրվող զեղչը չի տարածվում պարեկային ծառայությունների կողմից արձանագրված խախտումների վրա. նման դեպքերում տուգանքները դուրսգրվում են անմիջապես դեպքի վայրում:
Առաջարկվող զեղչից օգտվելու համար անհրաժեշտ էր մինչև 2024 թ. մայիսի 1-ը գրանցում կատարել պաշտոնական պորտալում roadpolice.am, այլընտրանքային հարթակների միջոցով ստացված ծանուցումները հաշվի չեն առնվում: