ԵՐԵՎԱՆ, 19 մարտի – Sputnik. Պաղեստինա-իսրայելական հակամարտության սրման սկզբից ի վեր Գազայի հատվածում ՄԱԿ-ի 280 աշխատակից է զոհվել: Այս մասին հայտնել է ՄԱԿ-ի գլխավոր քարտուղարի պաշտոնական ներկայացուցչի տեղակալ Ֆարհան Հակը։ Նրա խոսքը մեջբերում է ՌԻԱ Նովոստին։
Այսօր ՄԱԿ-ի նախագծերի սպասարկման վարչությունը (UNOPS) հաստատել էր, որ իր աշխատակիցներից մեկը մահացել է կազմակերպության շենքին հասցված հարվածի հետևանքով:
Հակի խոսքով՝ ՄԱԿ-ի գլխավոր քարտուղար Անտոնիո Գուտերեշը խորապես ցնցված է տեղի ունեցածից:
«Գլխավոր քարտուղարը խստորեն դատապարտում Է ՄԱԿ-ի աշխատակիցների վրա բոլոր հարձակումները և կոչ է անում համակողմանի հետաքննություն անցկացնել»,- ընդգծել է կազմակերպության ներկայացուցիչը:
Հակը նաև հերքել է Գազայի կենտրոնում ՄԱԿ-ի շենքի վրա հարձակման հետևանքով երկու զոհի մասին տեղեկությունը՝ հայտնելով, որ տուժածներից մեկը ողջ է մնացել:
Հիշեցնենք` հունվարի 19-ից մինչև մարտի 1-ը Գազայի հատվածում հրադադար էր հաստատվել Իսրայելի և պաղեստինյան ՀԱՄԱՍ շարժման միջև ձեռք բերված համաձայնության շրջանակում։
Մարտի 18-ին հայտնի դարձավ, որ իսրայելական բանակը զանգվածային հարվածներ է հասցրել Գազայի հատվածում գտնվող մի շարք օբյեկտների, այդ թվում՝ Նուսեյրաթ և Ալ-Մավասի փախստականների ճամբարներին:
Ըստ Գազայի առողջապահական ծառայությունների՝ հարվածների հետևանքով մահացել է ավելի քան 400 մարդ, ևս մի քանի հարյուրը վիրավորվել են: