ԵՐԵՎԱՆ, 15 մարտի - Sputnik. Ուկրաինայի նախագահ Վլադիմիր Զելենսկին չի ընդունում Կուրսկի մարզում Ուկրաինայի զինված ուժերի շրջափակման փաստը: Այս մասին գրում է ՌԻԱ Նովոստին։
Մարտի 14-ին Թրամփը հայտարարել էր, որ Ռուսաստանի նախագահ Վլադիմիր Պուտինին խնդրել է խնայել ամբողջովին շրջապատված Ուկրաինայի զինված ուժերին: Պուտինն իր հերթին հայտարարել է, որ ըմբռնումով է մոտեցել Թրամփի կոչին և կարող է Ուկրաինայի զինվորականների նկատմամբ կիրառել մարդասիրության սկզբունքները:
«Մեր ուժերի գործողությունը Կուրսկի մարզի որոշ շրջաններում շարունակվում է։ Ստորաբաժանումները առաջադրանքները կատարում են հենց այնպես, ինչպես անհրաժեշտ է: Ուկրաինական ուժերի գործողությունների արդյունքում այլ ուղղություններից հետ քաշվել և այդ տարածաշրջան են բերվել զգալի թվով ռուսական ուժեր։ Մեր զորքերը շրջափակված չեն»,-ասվում է Զելենսկու տելեգրամյան ալիքում հրապարակված հաղորդագրության մեջ։
Ավելի վաղ՝ մարտի 13-ին, ՌԴ Անվտանգության խորհրդի մշտական անդամների հետ օպերատիվ խորհրդակցության ժամանակ Պուտինը հայտարարել էր, որ սահմանային հատվածում ուկրաինական խմբավորումը լիովին մեկուսացված է և գտնվում է կրակային լիակատար վերահսկողության տակ: Նա ընդգծել էր, որ բոլոր գերիներին պետք է վերաբերվել մարդասիրաբար՝ ըստ ՌԴ օրենսդրության, սակայն ռազմագերիների մասին Ժնևի կոնվենցիայի գործողությունը կիրառելի չէ օտարերկրյա վարձկանների նկատմամբ:
Նախօրեին ՌԴ նախագահի օգնական Յուրի Ուշակովը հայտարարել էր, որ Պուտինը դրական է արձագանքել Կուրսկի մարզում արգելափակված ուկրաինացի զինծառայողների ճակատագրի վերաբերյալ Թրամփի դիմումին: Մոսկվան երաշխավորում է Ուկրաինայի զինված ուժերի զինծառայողների կյանքն ու կցուցաբերի արժանապատիվ վերաբերմունք, եթե Կիևը նրանց հրամայի վայր դնել զենքը և հանձնվել։