ԵՐԵՎԱՆ, 15 մարտի – Sputnik․ Անվայել պահվածքի համար ձերբակալված Թուրքիայի քաղաքացուն երեք օր պահել են ձերբակալվածների պահման վայրում։ Այս մասին իր ֆեյսբուքյան էջում գրել է երևանյան «Լոնդոն» հյուրանոցի համահիմնադիր Գևորգ Բարսեղյանը։ Նա նշել է, որ ոստիկանություն ահազանգողը հենց ինքն է եղել և մանրամասներ է հայտնել միջադեպի վերաբերյալ։
«Թուրքիայի քաղաքացին սենյակ էր ամրագրել ու ժամանել «Լոնդոն հյուրանոց։ Կեցության երկրորդ գիշերը ալկոհոլի ազդեցության տակ վիրավորական արտահայտություններ է ուղղել մեր աշխատակցի հասցեին։ Ես, այդ մասին տեղեկանալով աշխատակցից, ահազանգել եմ ոստիկանություն, որպեսզի խուլիգանին սանձեն»,- գրել է Բարսեղյանը։
Նրա խոսքով՝ վերջում Թուրքիայի քաղաքացին նաև ներողություն է խնդրել իրենից ու աշխատակազմից։
Ավելի վաղ հայտնել էինք, որ Երևանում Թուրքիայի քաղաքացին իրեն անհարգալից է պահել, հայհոյել ու վիրավորել մարդկանց, ինչի պատճառով նրան ձերբակավել ու ոստիկանության բաժին են տեղափոխվել։ Դեպքը տեղի է ունեցել մարտի 11-ին: Ժամը 12։05-ի սահմաններում ոստիկանություն ահազանգ է ստացվել, որ Թումանյան 21/2 հասցեում գտնվող «Լոնդոն» հյուրանոցի հյուրը՝ Թուրքիայի քաղաքացի 41-ամյա Ալի Ասլանը, ոգելից խմիչքի ազդեցության տակ հայհոյում և անհարգալից պահվածք է դրսևորում հյուրերի և աշխատակիցների նկատմամբ:
Հյուրանոց ժամանած ոստիկանները Ա. Ասլանին խուլիգանություն կատարելու հիմնավոր կասկածով տեղափոխել են ոստիկանության Կենտրոնական բաժին: