ԵՐԵՎԱՆ, 14 մարտի - Sputnik. ԱՄՆ պետքարտուղար Մարկո Ռուբիոն ժամանել է Քվեբեկ (Կանադա)՝ մասնակցելու «Մեծ յոթնյակի» գագաթնաժողովին: Արդեն օդանավակայանում ամերիկյան դիվանագիտության ղեկավարին «ջերմ» ընդունելություն են ցուցաբերել՝ ինքնաթիռի թեքահարթակի մոտ փռելով փոքրիկ կարմիր գորգ (ավելի շուտ նման է ֆիթնեսի գորգի), որը մասամբ հայտնվել է օդանավասանդուղքի մոտի մեծ ջրափոսում։
Սոցցանցերի օգտատերերն արդեն ծաղրում են ԱՄՆ պետքարտուղարին և գովում կանադացիների «հնարամտությունը»։ Լրատվամիջոցները հարցնում են՝ ի՞նչ է դա՝ պատահականությո՞ւն, թե՞ կանադացիների խորհրդանշական ժեստ։
Կանադացիները Միացյալ Նահանգներից դժգոհելու շատ պատճառներ ունեն։ ԱՄՆ-ն ավելի վաղ հայտարարել էր Կանադայից ապրանքների ներմուծման համար 25 % մաքսատուրք սահմանելու մասին: Կանադայի՝ այն ժամանակվա վարչապետ Ջասթին Թրյուդոն հայտարարել էր 30 մլրդ դոլար արժողությամբ ապրանքների համար 25 % հակադարձ մաքսատուրքի մասին։ Դրանից կարճ ժամանակ անց Թրյուդոն հրաժարական տվեց։
Բացի այդ, դեռևս ԱՄՆ նախագահի պաշտոնը ստանձնելուց առաջ Դոնալդ Թրամփը հրապարակել է Միացյալ Նահանգների քարտեզը և Կանադան Միացյալ Նահանգների 51-րդ նահանգը դարձնելու իր սկանդալային առաջարկները: Ի պատասխան Ջասթին Թրյուդոն բացառել է երկրի՝ ԱՄՆ-ին միանալու հնարավորությունը՝ հայտարարելով, որ Կանադան երբեք Միացյալ Նահանգների մաս չի դառնա։ Արդեն երդմնակալությունից հետո Թրամփը Կանադային լուրջ հարկային մեղմացումներ է խոստացել, եթե երկիրը մտնի ԱՄՆ-ի կազմ՝ որպես 51-րդ նահանգ: