ԵՐԵՎԱՆ, 6 մարտի - Sputnik. Էմանուել Մակրոնի հայտարարությունները տպավորություն են ստեղծում, թե Ֆրանսիան պատերազմի շարունակություն է փնտրում։ Այս մասին հայտարարել է ՌԴ նախագահի մամուլի քարտուղար Դմիտրի Պեսկովը՝ մեկնաբանելով միջուկային զենքի մասին Ֆրանսիայի նախագահի խոսքերը։
Նախօրեին Մակրոնն ազգին ուղղված ուղերձում հայտարարել էր, որ Եվրոպայի երկրները ֆրանսիական միջուկային պաշտպանության տակ ընդունելու հնարավորության շուրջ քննարկումներ կսկսի դաշնակիցների հետ՝ հիմք ընդունելով Գերմանիայի կանցլերի թեկնածու Ֆրիդրիխ Մերցի կոչը: Նա նաև հայտարարել է Եվրոպայի և Ֆրանսիայի համար սպառնալիքների աճի մասին, այդ թվում՝ իբր, Ռուսաստանի կողմից։
Պեսկովը Ֆրանսիայի նախագահի միջուկային հռետորաբանությունն անվանել է «ծայրահեղ վտանգավոր և առճակատման տանող»:
«Եթե ծանոթանանք Մակրոնի ելույթին, ապա այնպիսի տպավորություն է, որ Ֆրանսիան, իրոք, պատերազմի շարունակություն է փնտրում... Ավելին, այն արդեն պատրաստ է իր միջուկային սպառազինությունն օգտագործել անվտանգության գործում և այլն: Սա արդեն Եվրոպայում միջուկային առաջնորդության, այսինքն՝ առճակատման տանող հավակնություն է», - նշել է Պեսկովը։
Նա նաև Ֆրանսիայի նախագահի խոսքերում մատնանշել է մի շարք անճշտություններ։ Օրինակ՝ Մակրոնը Ռուսաստանին մեղադրել է Մինսկի համաձայնագրերը խախտելու մեջ, բայց չի հիշել, որ Փարիզում բացահայտ խոստովանել են, որ մտադիր էլ չեն եղել դրանք իրականացնել։