ԵՐԵՎԱՆ, 6 մարտի – Sputnik. Ֆրանսիան կշարունակի հետախուզական աջակցություն ցուցաբերել Ուկրաինային՝ չնայած Վաշինգտոնի կողմից Կիևին հետախուզական տեղեկատվության փոխանցման դադարին։ Աս մասին վստահեցրել է Ֆրանսիայի պաշտպանության նախարար Սեբաստիան Լեկորնյուն։
«Մեր հետախուզությունն ինքնիշխան է: Վերջին տարիներին մեզնից երկար ժամանակ պահանջվեց այն ամրապնդելու համար, բայց առավելությունն այն է, որ մենք դա արեցինք իսկապես մեր հնարավորություններով: Այնպես որ, այո՛, մենք ունենք հետախուզական ռեսուրսներ, որոնք տրամադրում ենք ուկրաինացիներին», - ասել է նա «France Inter» ռադիոկայանի եթերում:
Նրա խոսքով` դա վերաբերում է, մասնավորապես, ամերիկյան ծառայությունների կողմից տրամադրվող արբանյակային տվյալներին։ Տեղեկատվության փոխանցումը, նրա պնդմամբ, դադարեցվել է երեկ կեսօրից հետո։
Լեկորնյուն կարծում է՝ բրիտանացիների համար դժվար կլինի ինչ-որ կերպ լրացնել այդ բացը Ուկրաինայի համար՝ ԱՄՆ-ի հետ սերտ համագործակցության պատճառով։
Ավելի վաղ ԱՄՆ պաշտպանության նախարարությունը ՌԻԱ Նովոստիին հայտնել էր, որ պատրաստ չէ մեկնաբանել Ուկրաինային հետախուզական տվյալների տրամադրման կասեցման մասին տեղեկությունը։
Մինչ այդ «Financial Times»-ը հայտնել էր, որ ԱՄՆ-ն դադարել է Ուկրաինային հետախուզական տվյալներ տրամադրել։ Ավելի ուշ «Sky News» հեռուստաալիքը` հղում անելով ուկրաինական աղբյուրին, պարզաբանեց, որ ԱՄՆ-ն դադարեցրել է հետախուզական տվյալներ փոխանցել Կիևին ամբողջությամբ, այլ ոչ թե ընտրովի։