ԵՐԵՎԱՆ, 2 մարտի – Sputnik․ Իրանի նախագահ Մասուդ Փեզեշքիանը խորհրդարանում հայտարարել է, որ մտադիր էր Վաշինգտոնի հետ բանակցությունները վերսկսել միջուկային գործարքի և պատժամիջոցների վերացման շուրջ, սակայն ԱՄՆ-ի հետ երկխոսությանը դեմ է արտահայտվել Իրանի հոգևոր առաջնորդ այաթոլլա Ալի Խամենեին: Տեղեկությունը հայտնում է իրանական IRNA լրատվական գործակալությունը։
«Ես կարծում էի, որ մենք պետք է երկխոսություն սկսենք (ԱՄՆ-ի հետ-խմբ.), բայց գերագույն հոգևոր առաջնորդը հայտարարել է, որ ԱՄՆ-ի հետ ոչ մի բանակցություն չպետք է վարվի։ Արդյունքում մենք հայտարարել ենք, որ երկխոսություն չենք վարի Ամերիկայի հետ»,– ասել է Փեզեշքիանը։
Հունվարի վերջին Իրանի արտաքին գործերի նախարար Աբբաս Արաղչին հայտարարել էր, որ եվրոպական երկրների հետ Թեհրանի բանակցությունները շարունակվում են: Նրա խոսքով՝ միջուկային գործարքի մասնակիցների նկատմամբ Իրանի անվստահության վերացումը հնարավոր է գործուն քայլերի և կոնկրետ քաղաքականության, այլ ոչ թե գեղեցիկ խոսքերի միջոցով: Նախարարն ընդգծել է, որ երկրի իշխանությունները բանակցությունների մասին որոշում կկայացնեն, եթե տեսնեն դրանք հավասար պայմաններում անցկացնելու հնարավորություն:
2015 թվականին Մեծ Բրիտանիան, Գերմանիան, Չինաստանը, Ռուսաստանը, ԱՄՆ-ը, Ֆրանսիան և Իրանը միջուկային գործարք կնքեցին, որը ենթադրում էր պատժամիջոցների վերացում՝ Իրանի միջուկային ծրագիրը սահմանափակելու դիմաց: Բայդենի օրոք՝ 2018 թվականի մայիսին, ԱՄՆ-ն դուրս եկավ գործարքից և վերականգնեց Թեհրանի դեմ պատժամիջոցները: Իրանն ի պատասխան հայտարարեց համաձայնագրի շրջանակներում իր պարտավորությունների փուլային կրճատման մասին՝ հրաժարվելով, մասնավորապես, միջուկային հետազոտությունների սահմանափակումներից և ուրանի հարստացման մակարդակից: