ԵՐԵՎԱՆ, 1 մարտի - Sputnik. Ես երբեք չեմ ասել, որ Մարտի 1–ի գործը ամբողջությամբ բացահայտված է։ Այս մասին այսօր Մարտի 1–ի զոհերի հիշատակը հավերժացնող հուշարձանի մոտ լրագրողների հետ զրույցում ասաց ՀՀ վարչապետ Նիկոլ Փաշինյանը։
Նա բացատրեց, որ նկատի է ունեցել, թե իրավական գնահատականի արժանացնելու և հետաքննելու հանգամանքներ կան։
«Երբ ես ասում եմ բացահայտված է, նկատի ունեմ, որ տեղի է ունեցել` բռնի ուժով, բանակի ներգրավմամբ, հանցավոր խմբավորումների, ապօրինի զինված խմբավորումների ներգրավմամբ քաղաքացիական բողոքների ճնշում ու սպանություններ։ Այս ամենն ինչ որ ձևով ընթացք պետք է ստանա, իրավական գնահատական պետք է ստանա»,– ասաց նա։
ՀՀ վարչապետը վստահեցրեց, որ Մարտի մեկի գործն ամբողջությամբ բացահայտելու խնդիրը շարունակում է մնալ իր կառավարության կարևոր խնդիրներից մեկը։
«Գործերը պետք է բացահայտվեն այնքան , ինքան դա հնարավոր է բացահայտվել»,– հավելեց նա։
Հիշեցնենք, որ դեռ 2018-ին «Թավշյա հեղափոխության» հանրահավաքներից մեկի ժամանակ Նիկոլ Փաշինյանը իր ելույթում հայտարարել էր, որ Մարտի 1-ի գործն ամբողջ ծավալով բացահայտված է։
2008 թվականի փետրվարի 20-ից Երեւանի կենտրոնում Հայաստանի ընդդիմությունը Հայաստանի առաջին նախագահ Լեւոն Տեր-Պետրոսյանի ղեկավարությամբ ցույցեր էր կազմակերպում նախագահական ընտրությունների արդյունքների դեմ: 2008 թվականի մարտի 1-ին դրանք վերածվեցին զանգվածային անկարգությունների։ Արդյունքում 10 մարդ զոհվեց, ավելի քան 200-ը՝ վիրավորվեց։