Հունգարիան արգելափակել է պատժամիջոցները ԲԿՄԱ և «Ռոստով» ֆուտբոլային ակումբների նկատմամբ

ԵՐԵՎԱՆ, 24 փետրվարի - Sputnik. Հունգարիան արգելափակել է Էստոնիայի կառավարության նախաձեռնած պատժամիջոցների կիրառումը Ռուսաստանի Պրեմիեր լիգայի ԲԿՄԱ և «Ռոստով» ֆուտբոլային ակումբների նկատմամբ։ Այս մասին հաղորդում է ՌԻԱ Նովոստին՝ հղում անելով Vsquare պորտալին։

Ավելի վաղ հաղորդվել էր, որ Հունգարիան թույլ չի տվել Եվրամիության հակառուսական պատժամիջոցների 16-րդ փաթեթում ներառել 27 ֆիզիկական անձանց և կազմակերպությունների, այդ թվում՝ պատրիարք Կիրիլին, Ռուսաստանի օլիմպիական կոմիտեն և երկու ռուսական ֆուտբոլային թիմ, որոնց անունները չեն հստակեցվել:

Աղբյուրի տեղեկություններով՝ ԵՄ-ն ուզում էր պատժամիջոցներ սահմանել ԲԿՄԱ-ի և «Ռոստովի» դեմ՝ 2024 թվականի նոյեմբերին Էստոնիայի կառավարության նախաձեռնության համապատասխան։ Ինչպես ավելի վաղ հայտարարել էր Հունգարիայի արտաքին գործերի և արտաքին տնտեսական կապերի նախարար Պետեր Սիյարտոն, ցուցակից հանվել են ՌՕԿ-ն ու երկու ռուսական ֆուտբոլային թիմերը, քանի որ դա «անհեթեթ» կդարձներ Եվրամիության աշխատանքի ողջ մեխանիզմը:

Այսօր հայտնի է դարձել, որ ԵՄ պատժամիջոցների 16-րդ փաթեթում ներառվել են շախմատիստ Սերգեյ Կարյակինը և սպորտային մարմնամարզության օլիմպիական չեմպիոն Նիկիտա Նագորնին: Հաղորդվում էր, որ Ղրիմից սենատոր Կարյակինն իր գործունեությամբ իբր նպաստել է «Ուկրաինայի ինքնիշխանության և տարածքային ամբողջականության խախտմանը»: ԵՄ-ն նաև պնդում է, որ Նագորնին իբր «աջակցում և իրականացնում է գործողություններ և քաղաքականություն, որոնք խաթարում և սպառնում են Ուկրաինայի տարածքային ամբողջականությանը, ինքնիշխանությանն ու անկախությանը»: