Կարծում եմ՝ պրոֆեսիոնալ են գործել. Երևանի փոխքաղաքապետը գոհ է իրենց կատարած աշխատանքից

ԵՐԵՎԱՆ, 23 փետրվարի – Sputnik. Երևանում տեղացած առատ ձյան հետևանքով երթևեկությունը դադարեցրած վարորդներն ուղղակի խնդիրների էին հանդիպել, բայց տեխնիկական հագեցվածության հարց չի եղել։ Sputnik Արմենիային այս մասին վստահեցրեց Երևանի փոխքաղաքապետ Լևոն Հովհաննիսյանը` անդրադառնալով փետրվարի 20-ից հանրապետությունում, մասնավորապես Երևանում առատ ձյան հետևանքով ստեղծված իրավիճակին։

Նշենք, որ փետրվարի 20-ին, ժամը 17։30–18։00–ից սկսած մայրաքաղաքում կաթվածահար էին եղել մի շարք փողոցներ, մասնավորապես Մյասնիկյան, Գայի պողոտաները, որտեղ նաև հանրային տրանսպորտը չէր կարողանում երթևեկել: Խցանումներ առաջացել էին նաև առատ ձնից պատշաճ չմաքրված ճանապարհներին տեղի ունեցած բազմաթիվ վթարների հետևանքով: «Երևանի ավտոբուս» ՓԲԸ-ն հայտնել էր, որ ճանապարհներին կանգնած և չերթևեկող ավտոբուսների վարորդներն ուղղակի դրսևորել են բարձր հոգատարություն և գիտակցություն, որպեսզի առատ ձյան ու սառույցի պայմաններում չվտանգեն քաղաքացիների կյանքը: Այնինչ, Երևանի քաղաքապետարանից մշտապես վստահեցնում են հանրային տրանպորտի համասեզոնային անիվներն օգտագործվում են նաև ձմռանը՝ ձյան և սառույցի ժամանակ:

Ինչ վերաբերում է քաղաքապետարանի կատարած մաքրման աշխատանքներին, նրա կարծիքով` իրենք կարողացել են պատշաճ կերպով «դիմավորել ցիկլոնը» ու նույն կերպ էլ կկարողանան «ճանապարհել»։ Վստահեցրեց` իրենց աշխատակիցները բավականին պրոֆեսիոնալ են գործել, մնացածն էլ բնության հարց է եղել, որի դեմ երբեմն մարդն անզոր է։

Հովհաննիսյանը կարծում է, որ իրենց կատարած աշխատանքները շատ նկատելի են ու իրենք 24/7 ռեժիմով աշխատում են` երթևեկելի հատվածները մշակում են աղ–ավազով։

Հիշեցնենք, որ փետրվարի 20–ին Երևանում 10 ժամում տեղացել է 15 մմ ձյուն, ինչը հավասար է կես ամսվա նորմային։