ԵՐԵՎԱՆ, 23 փետրվարի - Sputnik. Հայաստանում ՌԴՀարավային ռազմական օկրուգի ռազմակայանի զինծառայողները Գյումրում մասնակցել են Հայրենիքի պաշտպանի օրվա տոնակատարությանը:
Զորամիավորման շարահրապարակում ռազմաբազայի հրամանատարությունը և դիվանագիտական կորպուսի ու ուժային կառույցների ներկայացուցիչները, վետերաններն ու Գյումրու քաղաքապետարանի աշխատակիցները շնորհավորել են զինծառայողներին և նրանց ընտանիքների անդամներին:
Հանդիսավոր հանրահավաքին մասնակցող պատվավոր հյուրերն իրենց խոսքում կարևորել են երկու երկրների միջև համագործակցության ամրապնդումը, շնորհակալություն հայտնել ռուս զինծառայողներին՝ տարածաշրջանում խաղաղությանն աջակցելու և նպաստելու համար: Տեղի է ունեցել նաև Բաց դռների օր:
Ինչպես հաղորդում է Հայաստանում «Ռուսական տունը», բազայի հրամանատար, գնդապետ Ալեքսանդր Բեզբորոդովն անձամբ հյուրերին ներկայացրել է զորահանդեսին ցուցադրված զենքերի և տեխնիկայի մարտավարատեխնիկական բնութագրերը:
Բաց դռների օրվա շրջանակներում ցուցադրվել է զինտեխնիկա, անցկացվել են մրցույթներ և մարզական խաղեր, ինչպես նաև ցուցադրական ելույթներ, հյուրերին մատուցել են զինվորական շիլա և ռուսական ու հայկական ժողովրդական այլ ուտեստներ: