ԵՐԵՎԱՆ, 20 փետրվարի – Sputnik. Պաղեստինյան ՀԱՄԱՍ շարժումը Կարմիր խաչի միջազգային կոմիտեին է փոխանցել Գազայի հատվածում մահացած 4 իսրայելցի պատանդների աճյունները, այդ թվում՝ երկու երեխայի։ Տեղեկությունը հայտնում է ՏԱՍՍ–ը՝ հղում անելով եգիպտական «Ալ Քահիրա ալ Իխբարիա» հեռուստաալիքին, որը հեռարձակում է իրականացնում իրադարձությունների վայրից։
Կադրերում երևում է, որ ԿԽՄԿ մեքենաները հեռանում են պաղեստինյան անկլավի հարավում գտնվող Խան Յունիս քաղաքից, որտեղ տեղի է ունեցել աճյունների հանձնման արարողությունը: Մեքենաները շարժվում են դեպի իսրայելական զինվորականների տեղակայման վայրեր։
Երեկ Կարմիր խաչը հորդորել էր պատանդների մարմինները հանձնել գաղտնիության պայմաններում և հարգելով մարդկային արժանապատվությունը։ Սակայն ՀԱՄԱՍ-ի և «Իսլամական ջիհադ» խմբավորման համախոհները, ինչպես գերիների ազատ արձակման ժամանակ, Խան Յունիսում բեմ են տեղադրել, որտեղ զոհվածների աճյունները մնացել են մինչև ԿԽՄԿ-ին փոխանցելը:
Արմատականները պնդում են, որ բժիշկներին են հանձնել Բիբաս ընտանիքի անդամների (նրանցից ամենափոքրը՝ Քֆիրը, առևանգման պահին` 2023 թվականի հոկտեմբերի 7-ին, 9 ամսական է եղել, նրա եղբայր Արիելը` 4 տարեկան) և Օդեդ Լիֆշիցի մարմինները։ Երբ աճյունները հասնեն Իսրայել, ակնկալվում է, որ դրանք կհետազոտվեն դատաբժշկական փորձագետների կողմից, որպեսզի հաստատվի մահացածների ինքնությունը և պարզվի նրանց մահվան պատճառը: