ԵՐԵՎԱՆ, 20 փետրվարի – Sputnik. Գյումրու նախկին քաղաքապետ Վարդան Ղուկասյանն ու նրա թիկնապահն ազատ են արձակվել։ Տեղեկությունը Sputnik Արմենիային հայտնեց ՀՀ ՆԳՆ խոսնակ Նարեկ Սարգսյանը։
ՀՀ ՆԳ նախարարության մամուլի ծառայությունից Sputnik Արմենիային ավելի վաղ հայտնել էին, որ ապօրինի զենք–զինամթերք պահելու կասկածանքով 2 անձ է ձերբակալվել և տեղափոխվել քրեական ոստիկանության Շիրակի մարզային վարչություն։
Նշենք, որ Վարդան Ղուկասյանը պատրաստվում է մասնակցել Գյումրու քաղաքապետի ընտրություններին, որոնք կկայանան մարտի 30-ին։
Հիշեցնենք` 2023 թ–ի հոկեմբերի 4–ին Գյումրի համայնքի նախկին ղեկավար Վարդան Ղուկասյանի, նրա որդու և եղբոր նկատմամբ հանրային քրեական հետապնդում է հարուցվել փողերի լվացման, պաշտոնեական լիազորությունների չարաշահման և պաշտոնեական կեղծիք կատարելու մեղադրանքով։
ՀՀ քննչական կոմիտեն 2023 թ․դեկտեմբերին հայտնեց, որ Գյումրու նախկին քաղաքապետ Վարդան Ղուկասյանի կողմից առերևույթի հանցավոր ճանապարհով օտարված գույքի վրա արգելանք է կիրառվել։ Պարզվել է, որ նախկին պաշտոնյան օտարման ոչ ենթակա, պետական կամ համայնքային սեփականություն հանդիսացող, տարբեր հասցեներում գտնվող 24 անշարժ գույք է օտարել, որոնց կադաստրային արժեքը կազմել է 35 մլն 690 հազար 403 դրամ: