Ֆիզիկական անձանց եկամուտների համընդհանուր հայտարարագրման ինստիտուտի ներդրումը քաոսային իրավիճակ առաջացրեց նույնականացման քարտերի ձեռք բերման հարցում։
Երբ հայտարարվեց, որ քաղաքացիները պետք է հայտարարագրեն իրենց եկամուտները մինչև մայիս, բոլորը շտապեցին նույնականացման քարտեր ձեռք բերել, ինչն էլ պատճառ դարձավ գրանցման հետ կապված խնդիրների։
Թեև իշխանությունները մինչև նոյեմբեր հետաձգեցին հայտարագրման համար սահմանված վերջնաժամկետը, այդուհանդերձ, նույնականացման քարտ ստանալու համար օնլայն գրանցվելու և ֆիզիկապես հերթ պահելու խնդիրը մնում է չլուծված։
«Հերթագրումների իմաստով ակտիվության տեմպերը նույնն են։ Երևանում հերթագրման համար երբեմն պետք է սպասել մինչև հունիս».-Sputnik Արմենիայի հետ զրույցում փաստել է Միգրացիայի և քաղաքացիության ծառայության պետ Նելլի Դավթյանը։