ԵՐԵՎԱՆ, 14 փետրվարի - Sputnik. Հռոմի Պապ Ֆրանցիսկոսը տեղափոխվել է հիվանդանոց՝ ձգձգվող բրոնխիտի բուժման համար։ Այս մասին հայտնում է Սուրբ Աթոռի մամուլի ծառայությունը։
«Ընդունելությունների ավարտից հետո Ֆրանցիսկոս Պապը հոսպիտալացվել է անհրաժեշտ ախտորոշիչ հետազոտությունների և բրոնխիտի բուժումը ստացիոնար պայմաններում շարունակելու համար»,-ասվում է հաղորդագրության մեջ:
Նշենք, որ անցյալ շաբաթ Վատիկանի մամուլի ծառայությունը հայտնել էր, որ 88-ամյա քահանայապետը մասնավոր ընդունելություններն անցկացնում է Վատիկանի իր նստավայրում՝ բրոնխիտի պատճառով: Հիվանդության պատճառով Հռոմի Պապը մի քանի անգամ համընդհանուր ընդունելության քարոզը կարդալը հանձնարարել է Սուրբ Աթոռի պետքարտուղարության աշխատակցին։
2023 թվականի նոյեմբերի վերջին Ֆրանցիսկոս Պապը թոքերի հիվանդություն է ունեցել, որը նա նշել է որպես «սուր վարակիչ բրոնխիտ»։ Չնայած հիվանդությանը և հակաբիոտիկների կուրսին, կաթոլիկ եկեղեցու հայրապետը շարունակում էր ընդունելություններ անցկացնել և հանդես գալ կարճ հայտարարություններով: