ԵՐԵՎԱՆ, 11 փետրվարի – Sputnik․ Իշխանությունները շարունակում են զինված ուժերի հեղինակազրկման արշավը։ Այսօր Ազգային ժողովում հայտարարեց «Հայաստան» խմբակցության անդամ Գեղամ Մանուկյանը։
Նրա խոսքով՝ հեղինակազրկիման այս արշավը նոր փուլ թևակոխեց, երբ այս տարվա հունվարի 5-ին Հայաստանի զինված ուժերի գլխավոր շտաբի պետի նախկին տեղակալ Տիրան Խաչատրյանը կալանավորվեց 2 ամսով։
«Տիրան Խաչատրյանին մեղադրանք առաջադրվեց մի գործով, որ արդեն 4 տարի է՝ Քննչական կոմիտեի տիրապետության տակ է, Տիրան Խաչատրյանը բազմիցս հարցաքննվել է, տվել բացատրություններ, որևէ հիմք չկար մեղադրանք առաջադրելու, կալանք սահմանելու, բայց եկել է մի փուլ, որ «ամեն ինչում բանակն է մեղավոր» օպերացիան պետք է նոր շոուների ականատես լիներ»,- հայտարարեց Մանուկյանը։
Նրա խոսքով՝ իշխանությունների հրահանգով «զինվորականներն են մեղավոր» արշավը շարունակվում է, միաժամանակ քննչական մարմինները գաղտնիություն են դնում գործերի վրա՝ հնարավորություն չտալով հասարակությանը տեղեկանալ գործերի ընթացքին։ Վստահ է՝ Տիրան Խաչատրյանի գործն այն նույն ճակատագիրն է ունենալու, ինչ և Արցախի պաշտպանության նախկին նախարար, ՊԲ նախկին հրամանատար Միքայել Արզումանյանի դեպքում է՝ նա անազատության մեջ է, դատավարությունները փակ են, որևէ բան հասարակությունը չի իմանում։
«Այս քրեական գործերը դատարաններում փլվելու են։ Կարևորն այն է, որ իշխանությունն ունի թիրախներ և տեղեկություն չունեցող հասարակություն»,- եզրափակեց Մանուկյանը։
Վերջում նա անդրադարձավ նաև այսօր ԱԺ նախագահ Ալեն Սիմոնյանի ճեպազրույցին, որի ժամանակ նա արցախցի լրագրողին ասել էր, թե «մնայիք, կռվեիք»։ Մանուկյանը Սիմոնյանին խորհուրդ տվեց բարձրանալ ԱԺ գաղտնի բաժին և վերցնել 2023թ․ սեպտեմբերի 19-20 զոհերի ցանկը՝ տեսնելու, թե տևական շրջափակումից հետո հյուծված արցախցիներն ինչպես են պայքարել իրենց հողի համար։