ԵՐԵՎԱՆ, 8 փետրվարի - Sputnik. ՌԴ Պետդումայի վավերացմանն է ներկայացվել կայունացման և զարգացման եվրասիական հիմնադրամի (ԿԶԵՀ) ստեղծման մասին պայմանագրում փոփոխություններ կատարելու մասին արձանագրությունը, որը ենթադրում է հիմնադրամին տրամադրել առանձին միջազգային ֆինանսական կառույցի կարգավիճակ:
Բացատրական գրության մեջ նշվում է, որ իր գոյության ընթացքում հիմնադրամն ընդլայնել է ֆունկցիոնալությունը՝ դառնալով տարածաշրջանային զարգացման ինստիտուտ։ Ընդ որում, գործունեության մի շարք ուղղություններում հիմնադրամը սկսել է բախվել ինստիտուցիոնալ սահմանափակումների հետ, որոնք դրված են նրա կառավարման սկզբնական կառուցվածքում և առնչվում են, այդ թվում, ԵԱԶԲ-ից նրա կախվածությանը:
«Միաժամանակ ԵԱՏՄ անդամ պետությունների կողմից ձևավորվել է հարցում՝ ստեղծել միության զարգացման և աջակցության մշտապես գործող ինստիտուտ։ Բացի այդ, ներկայիս աշխարհաքաղաքական իրավիճակը ի հայտ է բերել ԿԶԵՀ-ի՝ լիարժեք ինքնուրույն միջազգային ֆինանսական կազմակերպության օպերատիվ վերափոխման սուր անհրաժեշտությունը, որը ֆինանսավորում է տրամադրում հիմնադրամի անդամ պետությունների ազգային արժույթներով», - ասվում է փաստաթղթում։
Նշենք, որ Կայունացման և զարգացման եվրասիական հիմնադրամը ստեղծվել է 2009 թվականին Հայաստանի, Բելառուսի, Ղազախստանի, Ղրղզստանի, Ռուսաստանի և Տաջիկստանի կողմից: ԿԶԵՀ-ի նպատակն է նպաստել հիմնադրամի անդամ պետություններում տնտեսական և ֆինանսական կայունությանը, ինչպես նաև աջակցել դրանց հաստատուն զարգացմանը: