ԵՐԵՎԱՆ, 8 փետրվարի – Sputnik. Կոտայքի մարզի Հրազդան քաղաքում հայտնաբերվել է կրծքավանդակի հատվածում սուր կտրող, ծակող առարկայից ստացած հետքերով տղամարդու մարմին։ Տեղեկությունը Sputnik Արմենիային հայտնեց ՀՀ ՆԳ նախարարի մամուլի խոսնակ Նարեկ Սարգսյանը։
Դեպքի մասին ահազանգը ստացվել է փետրվարի 8-ին, ժամը 05։16-ի սահմաններում։
«Ոստիկանությունում հաղորդում է ստացվել, որ անհայտ քաղաքացին մեքենայով սպանված քաղաքացի է տեղափոխել իրենց մոտ: Արձանագրվել է, որ մեքենայով տեղափոխվել է 36-ամյա Աղասի Աբգարյանի դիակը՝ կրծքավանդակի հատվածում սուր կտրող-ծակող գործիքով հասցված վնասվածքով: Անհետաձգելի օպերատիվ-հետախուզական միջոցառումների շնորհիվ պարզվել է, որ 36-ամյա տղամարդուն դանակահարել և սպանել է Հրազդանի 44-ամյա մի բնակիչ, որը հայտնաբերվել և սպանությունը կատարելու կասկածանքով ձերբակալվել է»,– նշեց Սարգսյանը։
Նրա խոսքով` ըստ նախնական տեղեկությունների՝ կենցաղային հարցերի շուրջ վիճաբանության ընթացքում 44-ամյա տղամարդը սուր կտրող-ծակող գործիքով հարվածներ է հասցրել Աղասի Աբգարյանին, որը մահացել է։
Նախաձեռնվել է քրեական վարույթ։
Shamshyan.com–ն էլ հայտնում է, որ տղամարդու դին հայտնաբերել են ԲԿ-ի մոտ կայանած «Mazda 3» մակնիշի ավտոմեքենայի հետևի նստատեղին։