«Հայաստանի և Ադրբեջանի միջև իրականացվող սահմանազատման գործընթացը չի կարող ազդել Հայաստան-Իրան սահմանների վրա».-Իսլամական հեղափոխության հաղթանակի 46-րդ տարեդարձի առիթով հրավիրված մամուլի ասուլիսում նշել է Հայաստանում Իրանի դեսպան Մեհդի Սոբհանին։
Ինչ վերաբերում է, այսպես կոչված, «Զանգեզուրի միջանցքին», ապա, դեսպանի խոսքով` միայն Իրանն է աջակցում Հայաստանին՝ դեմ հանդես գալով այսպես կոչված «Զանգեզուրի միջանցքին»։ Տարածաշրջանի երկրների շարքում միայն Իրանն է այս հարցում Հայաստանի կողքին կանգնած».-շեշտել է Սոբհանին։
Անդրադառնալով Երևանի Հանրապետության հրապարակում իրանցիների մասնակցությամբ «Ղարաբաղ» երգի աղմկահարույց տեսանյութին, Հայաստանում Իրանի դեսպանն ասել է, որ այն, ինչ հեռարձակվել է, շատ կասկածելի է, բազմաթիվ հարցեր է առաջացնում և պետք է ուսումնասիրվի։
«Անկեղծ ասած` ես էլ եմ նայել ու լսել, սակայն հստակ չէր լսվում, թե նրանք ինչ են ասում։ Մեր դիրքորոշումը հետևյալն է` ովքեր ռասիստական և ազգայնական լոզունգներով են հանդես գալիս, նրանք ոչ Իրանի ժողովրդի ներկայացուցիչներ են, ոչ էլ Իրանի պաշտոնական դիրքորոշում արտահայտողները։
«Ինչ վերաբերում է Եվրամիության դիտորդական առաքելությանը, ապա Իրանը դրական դիրքորոշում ունի, քանի որ այն ոչ ռազմական առաքելություն է։ Երևանը Թեհրանին ասել է, որ առաքելության նպատակը կայունության պահպանումն ու լարվածության կանխումն է».-նշել է իրանցի դիվանագետը։
Sputnik Արմենիայի հետ զրույցում Իրանագետ Նվեր Դավթյանը Հայաստանում Իրանի դեսպան Մեհդի Սոբհանիի ասածներում արտառոց ոչինչ չի նկատում, փոխարենը արձանագրում է, որ Թեհրանը վճռական է Հայաստանի հետ սահմանների անխախտելիության և, այսպես կոչված, Զանգեզուրի միջանցքին դեմ լինելու հարցում։
«Իրանի հետ ճիշտ ու կառուցողական քաղաքականության դեպքում Հայաստանը կնվազեցնի իր ռիսկերը բոլոր ոլորտներում».-նշում է Դավթյանը։