ԵՐԵՎԱՆ, 30 հունվարի – Sputnik. Վաշինգտոնում կործանված ինքնաթիռում եղել են գեղասահորդներ և ռուսաստանցի մարզիչներ, որոնք վերադառնում էին ԱՄՆ–ի առաջնությունից։ Ուղևորների ցանկում են գեղասահքի աշխարհի չեմպիոններ Եվգենյա Շիշկովան և Վադիմ Նաումովը: Նրանց որդին՝ Մաքսիմ Նաումովը, որի մարզիչները ծնողներն էին, հունվարի 27-ին էր մեկնել ԱՄՆ-ի առաջնության մրցումներից։
Ամերիկացի գեղասահորդ Ջոն Մարավիլային չի հաջողվել նստել ինքնաթիռ, քանի որ պարզվել է` նրա շունը չափազանց մեծ է օդանավով տեղափոխելու համար։
Ընդ որում` նա նշել է, որ երբ մեկնել է մրցումների, կենդանին հանգիստ անցել է բոլոր վերահսկողական ընթացակարգերը։ Երբ վերադառնալիս շունը խոչընդոտ է դարձել, Մարավիլան ճամփա է ընկել մեքենայով և փրկվել է։
Գեղասահորդ Իլյա Մալինինը ողբերգությունից րոպեներ անց սոցցանցերում գրել է. «Հուսով եմ և աղոթում եմ, որ բոլոր նրանք, ովքեր եղել են օդանավում, ողջ են։ Աստված պահապան ձեզ»: Մինչդեռ, ըստ ամերիկյան իշխանությունների, փրկվածներ չկան։
Ուղևորների նախնական ցուցակում (կարող են անճշտություններ լինել) նշված են հետևյալ անունները` Էնդրյու Տորգաշով, Մաքսիմ Նաումով, Քեթի Մակբեթ, Դանիիլ Պարկման, Քրիստինա Կարեյրա, Էնթոնի Պոնոմարենկո, Ալեքսեյ Շչեպետով, Արտյոմ Մարկելով, Անտոն Սպիրիդոնով, Դանիլա Սավելև:
Մինչ այս լուրեր էին տարածվել, որ ինքնաթիռում են եղել նաև Ալիսա Եֆիմովան և նրա խաղընկեր Միշա Միտրոֆանովը, ինչպես նաև Անաբել Մորոզովան։ Բայց պարզվել է, որ նրանք ավելի շուտ են մեկնել։
Ավելի վաղ հայտնել էինք, որ Վաշինգտոնի երկնքում՝ Ռեյգանի անվան ազգային օդանավակայանի մոտ, ուղևորատար ինքնաթիռ ու ռազմական ուղղաթիռ են բախվել։
Նախնական տվյալներով՝ ինքնաթիռում եղել է 60 ուղևոր և անձնակազմի 4 անդամ, իսկ ուղղաթիռում ՝ 3 զինվորական: ԶԼՄ-ների տեղեկություններով՝ ինքնաթիռը երկու մասի է բաժանվել, բեկորները ցրվել են ջրային տարածքում: Գետից դուրս է բերվել 18 դի։