ԵՐԵՎԱՆ, 30 հունվարի – Sputnik. Ազգային ժողովի պաշտպանության և անվտանգության հարցերի հանձնաժողովը 1 ամիս անց կրկին կհանդիպի անհետ կորածների հարազատների հետ։ Այսօր նրանց հանդիպումից հետո այս մասին հայտարարեց հանձնաժողովի նախագահ Անդրանիկ Քոչարյանը։
Ավելի վաղ տեղեկացրել էինք, որ ԱԺ պաշտպանության և անվտանգության հարցերի հանձնաժողովի անդամները, ՀՀ ԱԺ նախագահ Ալեն Սիմոնյանը, ԱԺ բոլոր խմբակցությունների պատգամավորները, պաշտպանության փոխնախարար Արման Սարգսյանը, ՀՀ մարդու իրավունքների պաշտպան Անահիտ Մանասյանը, գլխավոր դատախազ Աննա Վարդապետյանը, ԱԱԾ տնօրեն Արմեն Աբազյանը, ՀՀ քննչական կոմիտեի նախագահ Արթուր Պողոսյանը փակ հանդիպում են անցկացնում անհետ կորածների հարազատների հետ։
«Շատ կոնստրուկտիվ քննարկում է եղել, այն տևել է 5 ժամ և շատ կարևոր էր բոլորիս համար։ Մենք անելիքներ ունենք, մեկ ամիս հետո կհանդիպենք, բայց արդեն ինչ–որ խնդիրներ լուծած վիճակում»,– ասաց Քոչարյանը։
Նա կարծում է, որ այս գործընթացի մեջ պետք է սիրտ ու հոգի դրվի։ Նա վստահեցրեց` եթե հնարավոր լինի գեթ մեկ ճակատագիր փրկել, ապա ամեն ինչ կարվի դրա համար։