ԵՄ անդամակցելու գործընթացի մեկնարկի որոշումը ինտեգրացիայի ռեալ քայլ չի նշանակում. Sputnik Արմենիայի հետ զրույցւմ ասել է քաղաքագետ Արման Բոշյանը։
«Առաջին հերթին մեզ ԵՄ–ում ոչ ոք չի սպասում։ Սա ուղղակի քաղաքական քայլ է և չունի ուժ անգամ ՀՀ–ի ներսում, նույնիսկ եթե խորհրդարանն այն հաստատի, քանի որ միայն հանրաքվեն կարող է որոշել` ուզում է Հայաստանն ինտեգրվել ԵՄ–ին, թե ոչ»,– կարծում է քաղաքագետը։
Նրա համոզմամբ` կառավարության որոշումն իրականում քաղաքական ազդանշան է` ուղղված ՌԴ–ին առ այն, որ Հայաստանը չի շարունակելու խորացնել հարաբերությունները եվրասիական միությունների հետ։
Կառավարությունը երեկվա նիստում հավանություն տվեց Եվրամիությանն անդամակցելու գործընթացի մեկնարկին։ Որոշման քննարկման ժամանակ վարչապետ Նիկոլ Փաշինյանը հստակեցրել է, որ որոշումը բառի բուն իմաստով ԵՄ անդամակցություն չի նշանակում, անդամակցության հարցը պետք է որոշվի հանրաքվեով, բայց մինչ այդ Հայաստանը դեռ որոշակի գործողությունների ճանապարհային քարտեզ պետք է մշակի։
Ըստ նրա` ճանապարհային քարտեզն անհրաժեշտ է, որպեսզի հասարակության մեջ ակնկալիքները ճիշտ ձևակերպվեն։ Օրինակ` այս ընթացքում ԵՄ–ի հետ լուրջ զարգացումներ են տեղի ունեցել, որոնցից մեկը վիզաների շուրջ բանակցությունների մեկնարկն էր, որը ՀՀ օրակարգում եղել է տասնյակ տարիներ։