ԵՐԵՎԱՆ, 9 հունվարի – Sputnik. Հայաստանում սիգի և խեցգետնի որսի համար կտրուկ կաճեն բնօգտագործման վճարումները: ՀՀ հարկային օրենսգրքում համապատասխան փոփոխությունների նախագիծը հավանության արժանացավ ՀՀ կառավարության այսօրվա նիստի ժամանակ:
Մասնավորապես, սիգի բնօգտագործման վճարումները կաճեն 1 կգ սիգի համար՝ 50 դառնալով 200 դրամ, նույն դրույքաչափը նախատեսվում է կիրառել նաեւ խեցգետնի համար։
«1 կիլոգրամ սիգ ձկնատեսակի մանրածախ վաճառքի միջին գինը ՀՀ–ում կազմում է մոտ 1000 դրամ, իսկ սառեցված սիգն արտահանվում է մեկ կգ–ն մոտ 1400 դրամով։ Բնօգտագործման վճարը միջինում կազմում է սիգի վաճառքի գնի ընդամենը 5.7 տոկոսը։ Հետևաբար՝ գործող բնօգտագործման վճարի ցածր դրույքաչափը չի նպաստում կենսապաշարների՝ մասնավորապես սիգ ձկնատեսակի ողջամիտ օգտագործմանը»,– ասված է որոշման հիմնավորման մեջ։
Որոշման մեջ նաև նշվում է, որ վճարումների բարձրացումն անհրաժեշտ է որսի և ձկնորսության մասշտաբները սահմանափակելու և երկրի կենսառեսուրսները պահպանելու համար:
Ազգային ժողովում նախագծի ընդունման դեպքում այն ուժի մեջ կմտնի 2026 թվականին։