ՀԱՊԿ–ի հետ հարաբերություններում անդառնալիության կետը ՀՀ–ը կարող է անցնել 2025թ–ին, երբ պարզ կլինի կազմակերպությանը ֆինանսական մասնակցության հարցը. Sputnik Արմենիայի հետ զրույցում ասել է քաղաքագետ Սերգեյ Մելքոնյանը` վերլուծելով ՀԱՊԿ–ի հետ Հայաստանի հարաբերությունների անցած 1 տարին և անորոշ ապագան։
«Բայց այնտեղ կա մի քանի տարվա ժամկետ, որտեղ կարող է պարտ կուտակվել, եթե պետությունը դեռ մնում է կազմակերպության դե յուրե անդամ։ Իսկ Հայաստանը դեռ մնում է։ Հիմա 2025թ–ի հիմական հարցը կարող է լինել հենց այս ֆինանսական հարցը»,– ասել է քաղաքագետը։
Հիշեցնենք` 2024թ–ին ՀՀ ԱԳՆ–ը հայտարարեց, որ Հայաստանը դադարեցնում է ՀԱՊԿ–ի գործունեության ֆինանսավորմանը իր մասնակցությունը։
Դեռ տարեսկզբին` 2024–ի փետրվարին ֆրանսիական «France24» հեռուստաալիքին տված հարցազրույցում վարչապետ Նիկոլ Փաշինյանը հայտարարել էր, որ Հայաստանի նկատմամբ ՀԱՊԿ–ի պայմանագիրը չի կատարվել, և Երևանը սառեցրել է իր մասնակցությունը կազմակերպությանը:
Իսկ սեպտեմբերին Համաշխարհային հայկական համաժողովի իր ելույթում Փաշինյանը խոսեց ՀԱՊԿ–ի հետ հարաբերություններում անդառնալի կետի մասին, անգամ ասաց, որ կազմակերպությունը սպառնալիքներ է ստեղծել երկրի ինքնիշխանության համար։
Հատկանշական է, որ ՀԱՊԿ–Հայաստան թեման տարեվերջին ամփոփեց արդեն ոչ թե Հայաստանի վարչապետը, այլ Ադրբեջանի նախագահը` Համառուսաստանյան պետական հեռուստառադիոընկերությանը և ՌԻԱ Նովոստիին տված հարցազրույցում հայտարարելով, թե Հայաստանը փաստացի դուրս է եկել ՀԱՊԿ–ից, և դե–յուրե կլքի կառույցը, երբ Վաշինգտոնից թույլտվություն ստանա։