ԵՐԵՎԱՆ, 26 դեկտեմբերի – Sputnik. ԶՈւ թիկունքի վարչության պետ Արամ Պողոսյանն առաջիկա օրերին կազատվի աշխատանքից։ Տեղեկությունը հայտնում է «Հրապարակ» թերթը։
Նա պարբերականի հետ զրույցում հաստատել է, որ պատրաստվում է հեռանալ զբաղեցրած պաշտոնից, բայց դա իր որոշումն է, ոչ թե պաշտպանության նախարար Սուրեն Պապիկյանի։
«Պատճառ չկա։ Ուղղակի երկարամյա կենսաթոշակի իրավունք ձեռք բերելու համար եմ դուրս գալիս։ Ես համարյա 30 տարվա ծառայության ստաժ ունեմ, որոշել եմ դուրս գալ։ Այս պահին ես դրա իրավունքն ունեմ»,– ասել է Պողոսյանը։
Նա վստահեցրել է, որ նյութատեխնիկական ապահովության, իր զբաղեցրած պաշտոնի հետ կապված որևէ խնդիր չկա։
Թերթը գրում է, որ հնարավոր է` առաջիկայում պաշտոնից ազատվի նաև պաշտպանության փոխնախարար Կարեն Բրուտյանը, իսկ հունվարից` ՊՆ շինվարչության ղեկավար Վահագն Ստեփանյանը։
Նշենք, որ Արամ Պողոսյանը ԶՈւ թիկունքի պետ-վարչության պետ է նշանակվել 2022 թվականի փետրվարին։