ԵՐԵՎԱՆ, 24 դեկտեմբերի – Sputnik. Ղազախստանի ԱԳՆ–ն հաստատել է, որ երկիրը ԲՐԻԿՍ-ի գործընկերոջ կարգավիճակ է ստացել։ Այս մասին հայտնում է Sputnik Ղազախստանը՝ հղում անելով ԱԳՆ պաշտոնական ներկայացուցիչ Այբեկ Սմադիյարովին։
Նախօրեին ՌԴ նախագահի օգնական Յուրի Ուշակովը հայտնել էր, որ 2025 թվականի հունվարի 1-ից Ղազախստանը և ևս 8 երկրներ պաշտոնապես կստանան կազմակերպության գործընկերների կարգավիճակ։
Հրավերները նրանց ուղարկել են Կազանում ԲՐԻԿՍ-ի գագաթնաժողովի արդյունքներով։ Գագաթնաժողովին մասնակցել է նաև Ղազախստանի նախագահ Կասիմ-Ժոմարտ Տոկաևը։
ԲՐԻԿՍ-ը միջազգային կազմակերպություն է, որը ստեղծվել է 2006 թվականին Ռուսաստանի, Չինաստանի, Հնդկաստանի և Բրազիլիայի կողմից, իսկ 2011 թվականին միացավ Հարավային Աֆրիկան: Այս տարի կազմակերպությունում նախագահում է Ռուսաստանը։ Տարվա սկզբին դաշինքին միացել են Եգիպտոսը, Եթովպիան, Իրանը, Արաբական Միացյալ Էմիրությունները և Սաուդյան Արաբիան։