ԵՐԵՎԱՆ, 9 դեկտեմբերի - Sputnik. Իրանի հարավ-արևելքում գտնվող Սիստան և Բելուջիստան նահանգում ոստիկանությունը թմրավաճառների հետ փոխհրաձգությունից հետո առգրավել է 1100 կգ թմրանյութ և 2 ավտոմեքենա, հայտնում է Tasnim պետական գործակալությունը:
«Թմրանյութերով լի մեքենան հայտնաբերելուց հետո սպաները վարորդին կարգադրել են կանգ առնել։ Մաքսանենգները, տեսնելով, որ գտնվում են դժվար վիճակում, ոստիկանության աշխատակիցների ուղղությամբ կրակ են բացել։ Ոստիկանների պատասխան կրակից հետո մաքսանենգները թողել են ավտոմեքենան և դեպքի վայրից դիմել փախուստի: Գործողության արդյունքում առգրավվել է 900 կգ մեթամֆետամին, 200 կգ ափիոն և 2 ավտոմեքենա. հարուցվել է քրեական գործ»,- հայտնում է գործակալությունը։
Սիստան և Բելուջիստան նահանգը, որը գտնվում է Իրանի հարավ-արևելքում՝ Պակիստանի և Աֆղանստանի հետ սահմանին, հաճախ է հայտնվում թմրանյութերի շրջանառության և ահաբեկչության դեմ պայքարող սահմանապահների մահվան հետ կապված լրահոսում: