ԵՐԵՎԱՆ, 6 դեկտեմբերի – Sputnik. Պղնձի շուկայի համար մոտ ժամանակներս ամենանշանակալի իրադարձություններից մեկը տնտեսական գործունեության վերաբերյալ ամենամյա կենտրոնական համաժողովն է։ Գրում է Livemint ոլորտային հարթակը՝ վկայակոչելով Reuters–ին:
Նշենք, որ այս տարվա սեպտեմբերի վերջին պղնձի համաշխարհային գները (լոնդոնյան LME բորսայի գնանշումներով) մեկ տոննայի դիմաց աճել են մոտ 9 հազար դոլարից մինչև 10 հազար դոլար։ Այդ ժամանակ Չինաստանի Ժողովրդական բանկն ի աջակցություն շինարարության ոլորտի, հայտարարեց դրամավարկային քաղաքականության ամենանշանակալի մեղմացման մասին Covid–19 համավարակից ի վեր։
Գները հետո նորից սկսեցին նվազել, քանի որ ՉԺՀ իշխանությունների կողմից տնտեսության համար կիրառվող խթաններն այնքան էլ նշանակալի չէին, որքան ակնկալում էին ներդրողները, ինչը նշանակում է, որ դրանք չեն հանգեցրել պղնձի սպառման բավականին ուժեղ աճի։ Հայտնի է, որ Չինաստանում պղնձի սպառումը բավականին մեծ ծավալների է հասնում, և այս երկրի ազդեցությունը պղնձի համաշխարհային գների վրա էական է:
Նշենք, որ պղնձի խտանյութը (մաքուր պղնձի կիսաֆաբրիկատ) շարունակում է մնալ Հայաստանի արտահանման կարևորագույն ապրանքներից մեկը։ 2023 թվականին դրա արտահանման ծավալը կազմել է 483 մլն դոլար։ Դա զգալիորեն պակաս է նախորդ տարիների մակարդակից (նախկինում հիմնականում այդ ծավալները գերազանցում էին տարեկան 600 մլն դոլարը)։ Պետք է հաշվի առնել, որ 2022 թվականի 1–ին կիսամյակում պղնձի գները զգալիորեն բարձր էին, քան տարեվերջում, ինչպես նաև 2023 թվականի ընթացքում։