ԵՐԵՎԱՆ, 6 դեկտեմբերի – Sputnik. Անցած գիշերվա ընթացքում ՌԴ ՀՕՊ հերթապահ միջոցները Ռուսաստանի մարզերի երկնքում 33 ուկրաինական անօդաչու են ոչնչացրել։ Տեղեկությունը հայտնում է ՌԴ ՊՆ-ն։
«Անցած գիշերվա ընթացքում կանխվել են ՌԴ տարածքում գտնվող օբյեկտների ուղղությամբ ինքնաթիռատիպ ԱԹՍ-ների կիրառմամբ Կիևի ռեժիմի կողմից ահաբեկչական հարձակում իրականացնելու փորձերը։ ՀՕՊ հերթապահ միջոցները ուկրաինական 33 անօդաչու են ոչնչացրել», – ասվում է հաղորդագրության մեջ։
Նշվում է, որ 14 անօդաչու ոչնչացվել է Վորոնեժի մարզի երկնքում, 11-ը` Կուրսկի մարզի վրա, 7-ը` Բելգորոդի և մեկը՝ Ղրիմի Հանրապետության տարածքի վրա:
Գերատեսչությունում հայտնել են նաև, որ Սևծովյան նավատորմի ծովային ավիացիայի անձնակազմը Սև ծովում ոչնչացրել է Ղրիմի թերակղզու ուղղությամբ ընթացող երկու ուկրաինական անանձնակազմ նավ։
Հիշեցնենք՝ 2022–ի փետրվարի 24-ի վաղ առավոտյան Ռուսաստանի նախագահ Վլադիմիր Պուտինը հայտարարեց, որ Ուկրաինայի նկատմամբ հատուկ ռազմական գործողության մասին որոշում է կայացրել, քանի որ ԼԺՀ-ն ու ԴԺՀ-ն դիմել են օգնության խնդրանքով։
Ուկրաինայում մարտական գործողություններն ընթանում են մինչ օրս։
Ուկրաինական զորքը տարբեր եղանակներով (այդ թվում` ԱԹՍ–ներով) պարբերաբար գնդակոծում և գրոհում է ՌԴ սահմանամերձ շրջանները, մասնավորապես` Բելգորոդի, Բրյանսկի, Կուրսկի և Վորոնեժի մարզերը։