«Ղրիմը կլիներ Ուկրաինայի կազմում, եթե...». ՌԴ արտգործնախարարը բացատրել է իրավիճակը

ԵՐԵՎԱՆ, 6 դեկտեմբերի – Sputnik. Ղրիմը կլիներ Ուկրաինայի կազմում, եթե չլիներ 2014 թվականի հեղաշրջումը։Այս մասին հայտարարել է ՌԴ արտգործնախարար Սերգեյ Լավրովը ամերիկացի լրագրող Թաքեր Կառլսոնին տված հարցազրույցում։

2014 թվականի մարտին Ղրիմում հանրաքվե էր տեղի ունեցել, որի արդյունքներով բնակչության մեծամասնությունը կողմ էր քվեարկել Ռուսաստանի հետ վերամիավորմանը։

Նրա խոսքով` Ռուսաստանն անկեղծորեն շահագրգռված էր դադարեցնել Դոնբասում հեղաշրջումից հետո սկսված հակամարտությունը, սակայն դրա համար անհրաժեշտ էր, որ Մինսկի պայմանավորվածությունները լիովին կատարվեին։

«Բայց Ուկրաինայում հեղաշրջումից հետո ստեղծված կառավարությունը դրանք սաբոտաժի ենթարկեց։ Պայմանավորվածություն էր ձեռք բերվել, որ այդ կառավարությունը պետք է ուղիղ երկխոսության մեջ մտնի պետական հեղաշրջումը չընդունած մարդկանց հետ և նպաստի Ուկրաինայի այդ հատվածի հետ տնտեսական հարաբերությունների զարգացմանը։ Դրանցից ոչ մեկը չի արվել: Կիևի ռեժիմը հայտարարել է, որ երբեք նրանց հետ ուղիղ չի խոսի», – նշել է ռուս նախարարը։

Բացի այդ, ՌԴ ԱԳՆ ղեկավարը հիշեցրել է, որ ԱՄՆ-ն և արևմտյան այլ երկրներ ճանաչել են Կոսովոյի անկախության միակողմանի հռչակագիրը՝ ասելով, որ այդպիսով իրացվում է ինքնորոշման իրավունքը։

Մի քանի տարի անց Ղրիմի բնակիչներն անցկացրին իրենց հանրաքվեն։ Հրավիրված էին մեծ թվով միջազգային դիտորդներ։

«Արևմուտքից ասացին, որ իրենք չեն կարող ընդունել դա, քանի որ դա տարածքային ամբողջականության խախտում է...ՄԱԿ-ի կանոնադրությունը «մենյու» չէ: Դուք պետք է այն հարգեք ամբողջությամբ»,- ասել է Լավրովը։

Հիշեցնենք՝ 2022–ի փետրվարի 24-ի վաղ առավոտյան Ռուսաստանի նախագահ Վլադիմիր Պուտինը հայտարարեց, որ Ուկրաինայի նկատմամբ հատուկ ռազմական գործողության մասին որոշում է կայացրել, քանի որ ԼԺՀ-ն ու ԴԺՀ-ն դիմել են օգնության խնդրանքով։

Ուկրաինայում մարտական գործողություններն ընթանում են մինչ օրս։

Ուկրաինական զորքը տարբեր եղանակներով (այդ թվում` ԱԹՍ–ներով) պարբերաբար գնդակոծում և գրոհում է ՌԴ սահմանամերձ շրջանները, մասնավորապես` Բելգորոդի, Բրյանսկի, Կուրսկի և Վորոնեժի մարզերը։