ԵՐԵՎԱՆ, 28 նոյեմբերի – Sputnik. «Միասին» այլընտրանքային հասարակական-քաղաքական շարժումը ՀՀ քննչական կոմիտե առերևույթ հանցագործության վերաբերյալ հաղորդում է ներկայացրել՝ ընդդեմ ՀՀ վարչապետ Նիկոլ Փաշինյանի և փոխվարչապետ Մհեր Գրիգորյանի։ Տեղեկությունը հայտնում է համակարգող խորհուրդը։
««Միասին» այլընտրանքային հասարակական-քաղաքական շարժումը դիմում է ՀՀ Գլխավոր դատախազությանը և ՔԿ-ին՝ ՀՀ վարչապետ Նիկոլ Փաշինյանի և փոխվարչապետ Մհեր Գրիգորյանի նկատմամբ ՀՀ քրեական օրենսգրքի 299 հոդվածով քրեական վարույթ հարուցելու պահանջով, այն է՝ պետական դավաճանությունը։ Փաստում ենք, որ առերևույթ պետական դավաճանության հանցակազմի մեջ պետք է ներառվի Գորիս-Կապան ճանապարհի մի հատվածի հանձնումը Ադրբեջանին կասկածահարույց ինչ-որ փաստաթղթի հիման վրա, որի հետքերն անգամ չկան ՀՀ ԱԳՆ-ում»,- ասված է հաղորդման մեջ։
«Միասին» շարժումը նաև հիշեցրել է, որ դեռ 2020 թ․ ՀՀ ԱԳՆ նախարարի պաշտոնը զբաղեցնող Արա Այվազյանը 2024 թ․հուլիսի 26-ին փաստեր է հնչեցրել, որոնք ուղղակի հաստատում են Գորիս-Կապան ճանապարհի Ադրբեջանին հանձնելու գործընթացի հակասահմանադրականությունը։
Շարժումը նաև իրավապահ կառույցներից պահանջում է անաչառ քննել իշխանությունների գործողությունները, որոնք հանգեցրել են Հայաստանի բնակավայրերի, ինքնիշխան տարածքների և ենթակառուցվածքների փաստացի հանձնմանը Ադրբեջանին: Սա հանգեցրել է ՀՀ մի շարք քաղաքացիների իրավունքների և առաջին հերթին սեփականության իրավունքի կոպիտ խախտումների։
«Միասինը» հայտարարում է, որ առերևույթ ունեն հիմնավոր կասկած, որ առկա են հանցագործության հատկանիշներ, որոնք արտահայտվել են ՀՀ վարչապետ Նիկոլ Փաշինյանի և ՀՀ փոխվարչապետ Մհեր Գրիգորյանի գործողություններում։ Նշվում է, որ այս փաստաթղթերի մասին «Միասին» շարժման համահիմնադիրները և ներկայացուցիչները բազմիցս արտահայտվել են իրենց հրապարակային ելույթներում, բայց որևէ արձագանք չի հետևել, ուստի առկա է դիտավորության կասկած։
Խուսափելով որոշակի քրեաիրավական որակումներից և պահպանելով անմեղության կանխավարկածի սկզբունքը՝ շարժումը որոշում է զերծ մնալ վերոգրյալում նկարագրվածը անմիջապես որպես հանցագործություն դիտարկել՝ հայցելով իրավապահ մարմիններից քննություն իրականացնել օրենքին համապատասխան։