«Իշխանությունները որոշել են Արցախի քաղաքացիների խնայողությունները խլել և օգտագործել ըստ իրենց հայեցողության»․-Ազգային ժողովում լրագրողների հետ ճեպազրույցում ասել է «Հայաստան» խմբակցության պատգամավոր Արթուր Խաչատրյանը՝ նշելով, որ արցախցիների կենսաթոշակային կուտակային գումարները այս պահին սառեցված են:
Սահմանադրական դատարանում վիճարկվում է «Կենսաթոշակային համակարգի կուտակային բաղադրիչի մասնակիցների իրավունքների և օրինական շահերի պաշտպանության լրացուցիչ երաշխիքների մասին» օրենքի այն դրույթը, որով նախատեսվել է արցախցիների կուտակած գումարներն առանց նրանց կամքը հաշվի առնելու Հյաստանի կուտակային համակարգ տեղափոխելու մեխանիզմը։
«Կան Արցախի Հանրապետության քաղաքացիներ, որոնք ունեին կենսաթոշակային խնայողություններ. պատերազմից, հայաթափումից, էթնիկ զտումից հետո մարդկանց մոտ ծանր սոցիալ-տնտեսական խնդիրներ են, և մարդկանց մեծամասնության համար հույսը այդ խնայված գումարներն են։ Եթե իրենք Արցախի քաղաքացիներին ավտոմատ բերում են ՀՀ քաղաքացու իրավական ռեժիմի, այդ դեպքում ինչի՞ բոլոր հարցերում այդքան հետևողական չեն, թող բոլորին միանգամից առաջարկեին ՀՀ քաղաքացիություն և ասեին՝ ով չի ուզում, կարող է հրաժարվել»․-հավելել է Խաչատրյանը։
Պատգամավորի խոսքով՝ այդ գումարն առանց մարդու համաձայնությունը ստանալու տալիս են կենսաթոշակային հիմնադրամին, որն էլ ներդրում է անում։ Մինչդեռ ցանկացած քաղաքացի կարող է այդ ավանդային պայմանագիրը կնքել ցանկացած բանկի հետ: