ԵՐԵՎԱՆ, 22 նոյեմբերի – Sputnik. Ռուսաստանը աշխատանքային միգրանտների կարիքն ունի երկրի դինամիկ զարգացման համար: Այս մասին ՌԻԱ Նովոստիին տված հարցազրույցում հայտարարել է ՌԴ նախագահի մամուլի քարտուղար Դմիտրի Պեսկովը:
«Միգրանտներն անհրաժեշտություն են։ Բանն այն է, որ ժողովրդագրական իրավիճակը մեզ մոտ շատ լարված է։ Մենք աշխարհի ամենամեծ երկրում ենք ապրում, բայց քիչ ենք։ Որպեսզի մենք դինամիկ զարգանանք, իրագործենք զարգացման բոլոր ծրագրերը, մեզ, իհարկե, աշխատող ձեռքեր են պետք: Միայն ողջունում ենք նրանց»,-նշել է Պեսկովը։
Նրա խոսքով` Ռուսաստանում աշխատանքային միգրացիան պետք է կանոնակարգել, որպեսզի բացառվի միգրանտների շրջանում հանցավորությունը: Ռուսաստանի ղեկավարի մամուլի քարտուղարը կարծում է, որ այս ոլորտում կանոնները պետք է լինեն կոշտ, բայց հասկանալի և հարմար։
Ավելի վաղ ՌԴ նախագահ Վլադիմիր Պուտինը հայտարարել էր, որ իշխանությունները միգրանտներին ներգրավելու հարցում պետք է մտածեն առաջին հերթին երկրի քաղաքացիների շահերի մասին: Պետության ղեկավարն ընդգծել էր, որ միգրանտները ռուսաստանցիների համար անընդունելի չեն լինի, եթե իմանան օրենքները և պատրաստ լինեն հետևել դրանց, ինչպես նաև լավ տիրապետեն ռուսերենին: Պուտինը հավելել էր, որ Ռուսաստան եկած միգրանտները պետք է ապրեն մարդկային պայմաններում և օգտվեն բոլոր բարիքներից: