ԵՐԵՎԱՆ, 21 նոյեմբերի – Sputnik. Ռուսաստանի Դաշնության ռազմաօդային ուժերը հարված են հասցրել արդյունաբերական օբյեկտներից մեկին միջին հեռահարության հրթիռով` առանց միջուկային հիպերձայնային սարքավորումների։ Օգտագործվել է «Օրեշնիկ» համալիրը։ Այս մասին իր ուղերձում հայտարարեց ՌԴ նախագահ Վլադիմիր Պուտինը։
Ավելի վաղ ուկրաինական ԶԼՄ–ները գրում էին, որ ռուսական ռազմաօդային ուժերը միջմայրցամաքային բալիստիկ հրթիռով հարվածներ են հասցրել Դնեպրում, «Յուժմաշի» ուղղությամբ։
Պուտինն ասաց, որ ռուսական նորագույն հրթիռները նշանակետին են հարվածում վայրկյանում 2-3 կմ արագությամբ (10 մախ-խմբ.), հակառակորդի գործող հակահրթիռային պաշտպանության համակարգերն էլ դրանք չեն կարողանում որսալ։
Նա ընդգծեց, որ Ռուսաստանը վճռական ու հայելային պատասխան կտա էսկալացիային և իրեն իրավունք է վերապահում զենք կիրառել այն երկրների օբյեկտների դեմ, որոնք թույլ են տալիս զենքն օգտագործել ռուսական օբյեկտների դեմ։
«Յուժմաշը» ԽՍՀՄ տարիներին եղել է միջմայրցամաքային բալիստիկ հրթիռների արտադրության Խորհրդային Միության առաջատար ձեռնարկությունը։
Ուկրաինայի նախագահ Վլադիմիր Զելենսկին ավելի վաղ հայտարարել է, որ իրենք մտադիր են բալիստիկ հրթիռների զանգվածային արտադրություն սկսել։