ԵՐԵՎԱՆ, 21 նոյեմբերի – Sputnik. Երևանում «Գազպրոմ Արմենիա» ընկերության «Ուսումնա–սպորտային համալիր» հիմնարկի գործունեության իրականացման պայմանների մասին» համաձայնագրի ստորագրման մասին որոշումն այսօր հավանության արժանացավ ՀՀ կառավարության նիստի ժամանակ։
Համաձայնագիրը կստորագրվի Հայաստանի Հանրապետության և Ռուսաստանի Դաշնության կառավարութունների միջև:
«ՀՀ կրթության, գիտության, մշակույթի և սպորտի նախարարությունը կարևորում է ՀՀ–ի և ՌԴ–ի միջև կրթության և մշակույթի ոլորտներում փոխգործակցության ընդլայնումը, ՀՀ հանրակրթական ուսումնական հաստատություններում օտար լեզուների ուսումնասիրման համար որակապես այլ հիմքերի և բարենպաստ պայմանների ստեղծումը»,– ասված է որոշման հիմնավորման մեջ:
Ըստ համաձայնագրի` այս համալիրը հայերենով կիրականացնի կրթական գործունեություն տարրական ընդհանուր, հիմնական ընդհանուր և միջնակարգ ընդհանուր կրթության կրթական ծրագրերով՝ ռուսաց լեզվի պարտադիր դասավանդմամբ:
Միաժամանակ, ՌԴ դաշնային պետական կրթական չափորոշիչներին համապատասխան` համալիրը ռուսական հոսքում ռուսերենով կիրականացնի կրթական գործունեություն տարրական ընդհանուր, հիմնական ընդհանուր և միջնակարգ ընդհանուր կրթության կրթական ծրագրերով՝ հայերեն լեզվի պարտադիր դասավանդմամբ։
Համալիրում կարող են սովորել ՀՀ, ՌԴ քաղաքացիների, այլ պետությունների քաղաքացիների և քաղաքացիություն չունեցող անձանց երեխաները՝ ՀՀ օրենսդրությանը և հիմնադրի կողմից հաստատվող կարգին համապատասխան։
Նշենք, որ Երևանում «Գազպրոմ Արմենիա» ընկերության «Ուսումնա–մարզական համալիրը» շահագործման հանձնվել դեռևս 2019 թվականի մարտին, նույն տարվա դեկտեմբերից այն փաստացի գործում է։