ԵՐԵՎԱՆ, 20 նոյեմբերի - Sputnik. ԱՊՀ անդամ պետությունների Միջխորհրդարանական վեհաժողովում (ԱՊՀ ՄԽՎ) ստեղծարար արդյունաբերությունների մասին մոդելային օրենք է մշակվում: Այս մասին, ՌԻԱ Նովոստիի փոխանցմամբ, հայտարարել է ԱՊՀ ՄԽՎ խորհրդի նախագահ, ՌԴ Դաշնության խորհրդի խոսնակ Վալենտինա Մատվիենկոն։
Նրա խոսքով՝ «Նորաձևության համագործակցություն» ֆորումի հարթակներում արդեն շատ քննարկումներ են տեղի ունեցել, փորձի և գաղափարների փոխանակում է կայացել:
«Խնդրում եմ այդ գաղափարներն ու առաջարկներն ուղարկեք Դաշնության խորհուրդ, ուղարկեք ԱՊՀ Միջխորհրդարանական վեհաժողովի խորհուրդ։ Մենք անպայման կանդրադառնանք դրանց: Մասնավորապես, ներկայումս մենք ստեղծագործական արդյունաբերությունների մասին մոդելային օրենք ենք պատրաստում։ Այն արդեն փորձարկվում է»,-ասել է Մատվիենկոն «Նորաձևության համագործակցություն» 3-րդ միջազգային համաժողովի շրջանակներում ԱՊՀ երկրների թեթև արդյունաբերության և նորաձևության ոլորտի ներկայացուցիչների հետ հանդիպման ժամանակ։
ՌԴ Դաշնության խորհրդի խոսնակը նշել է, որ առաջարկությունների քննարկման ընթացքում հաշվի կառնվեն ազգային առանձնահատկությունները, արդյունքում կստացվի համաձայնեցված փաստաթուղթ:
Մատվիենկոն կարծում է, որ կարևոր է առավելագույնս համաժամանակեցնել, ներդաշնակեցնել Համագործակցության երկրների օրենսդրությունը։ Նրա խոսքով՝ թե՛ բիզնեսի, թե՛ արտադրողների համար ավելի հեշտ կլինի աշխատել, եթե ոլորտի օրենսդրական կարգավորման վերաբերյալ ընդհանուր մոտեցումներ լինեն։