Վաղը Հայաստանում մեկնարկում է ըմբշամարտի աշխարհի ռազմական առաջնությունը։
Ամիսներ առաջ ՊՆ-ն հայտնել էր, որ 10 հայ ըմբիշներ, այդ թվում՝ Փարիզի օլիմպիական խաղերի, Եվրոպայի և աշխարհի առաջնությունների մեդալակիրներ, որոնք պարտադիր զինվորական ծառայության են անցնել, պետք է մասնակցեն մրցաշարին։ Խոսքը աշխարհի կրկնակի չեմպիոն Արսեն Հարությունյանի, աշխարհի առաջնության բրոնզե մեդալակիրներ Վազգեն Թևանյանի և Արման Անդրեասյանի, ինչպես նաև Օլիմպիական խաղերի բրոնզե մեդալակիր Մալխաս Ամոյանի մասին էր։
Այսօր, սակայն, աշխարհի կրկնակի չեմպիոն Արսեն Հարությունյանը ֆեյսբուքում գրել էր, որ հայ անվանի մարզիկներին մրցապայքարից հեռացրել են։
Մրցաշարի բացմանը նվիրված մամուլի ասուլիսում լրագրողները պատճառների մասին հարց են ուղղել ԶՈՒ ֆիզիկական պատրաստության և սպորտի ծառայության պետ, գնդապետ Արման Դավթյանին։
«ՀՀ-ը՝ որպես հյուրընկալող երկիր, առաջնորդվել է ռազմական սպորտի միջազգային խորհրդի կանոնադրության բոլոր կետերի խստիվ պահպանմամբ։ Արդյունքում ընտրվել է այն հավաքական թիմը, որը ներկայացնելու է ՀՀ ԶՈՒ-ն։ Մրցաշարին այլ մարզիկների ներգրավելու պարագայում հնարավոր կլինեին բազմաթիվ շահարկումեր»,- ասել է ԶՈւ ներկայացուցիչը։