Հարկային փոփոխությունների նպատակը հասարակության նկատմամբ տոտալ վերահսկողություն սահմանելն է, այդ թվում` քաղաքական նպատակներով դա որպես մահակ օգտագործելը. Sputnik Արմենիայի հետ զրույցում ասել է Աուդիտորների պալատի նախագահ Նաիրի Սարգսյանը` մեկնաբանելով հարկային մարմնում ու հարկային դաշտում տիրող իրավիճակն ու առաջիկայում սպասվող փոփոխությունները։
Հիշեցնենք`կիրակի օրը հրաժարականի դիմում գրած 6 պաշտոնյաներից մեկը ՊԵԿ նախագահ Ռուստամ Բադասյանն էր։ Նրա պաշտոնավարման ավելի քան 3 տարվա ընթացքում կառավարությունը հայտարարում էր հարկային եկամուտների ու գրանցված աշխատատեղերի վիճակագրության ավելացման մասին։
Բայց ՊԵԿ նախագահի հրաժարականը ցույց տվեց, որ վարչապետը դժգոհ է եղել նրա ղեկավարած կառույցի աշխատանքից։ Ավելին, պարզվում է Փաշինյանը դժգոհ է եղել նաև հարկային օրենսդրությունից, չնայած վերջին տարիների ընթացքում դրանում կատարված փոփոխություններին։
Աղմկահարույց պաշտոնանկություններից օրեր առաջ Նիկոլ Փաշինյանը ԱԺ–ում հայտարարել էր, որ գործող Հարկային օրենսգիրքը ապապետական է, չի խրախուսում զարգացումը, չի խրախուսում ավելի շատ փող աշխատելը։ Նրա համոզմամբ` անհրաժեշտ է Հարկային նոր օրենսգիրք, որը կհամապատասխանի ՀՀ պետական շահերին: